Turkmanistonda 8 va undan ortiq farzandni dunyoga keltirgan ayollarga «Ene mähri» faxriy unvoni berildi

Kecha Ashgabatda Xalqaro xotin-qizlar kuni munosabati bilan davlat rahbari Serdar Berdimuhamedovning topshirig‘iga binoan, sakkiz va undan ortiq farzandni dunyoga keltirgan hamda tarbiyalagan onalarga Turkmaniston Prezidentining Farmoniga muvofiq, «Ene mähri» («Ona mehri») faxriy unvoni nishonlarini topshirish marosimi bo‘lib o‘tdi. Bu haqda «Watan» axborot dasturida xabar berildi.

Ta’kidlanganidek, Turkmanistonda xotin-qizlarga turli davlat imtiyozlari berilmoqda. Ularning zamonaviy darajada yashashlari va mehnat qilishlari uchun sharoitlar yaratilmoqda. Buning natijasida ayollarning ijtimoiy-siyosiy hayotdagi o‘rni faol ravishda yuksalmoqda. Bu esa turkman jamiyatining barqaror rivojlanishining muhim shartidir. Marosim davomida «Ene mähri» faxriy unvoniga loyiq ko‘rilgan ayollar turkman xalqining Milliy Lideriga hamda Turkmaniston Prezidentiga minnatdorchilik so‘zlarini aytdilar.