Turkmanistonda «Artyk» va «Garabogaz» bojxona postlari modernizatsiya qilindi
Turkmaniston hududidan oʻtuvchi xalqaro transport yoʻlaklaridagi bojxona postlarini bosqichma-bosqich takomillashtirish boʻyicha olib borilayotgan ishlar doirasida, «Artyk» va «Garabogaz» bojxona postlarida qurilish-taʼmirlash ishlari muvaffaqiyatli yakunlandi. Davlat bojxona xizmatining rasmiy sayti xabar berishicha, amalga oshirilgan tub islohotlar natijasida ushbu postlarning umumiy maydoni kengaytirildi, tovar va transport oʻtkazish qobiliyati esa xalqaro standartlar darajasiga koʻtarildi. Shuningdek, bu yerda yangi ijtimoiy-texnik binolar qurilib, mavjud obʼyektlarning qiyofasi toʻliq yangilandi.
Zamonaviy tekshirish uskunalari hamda innovatsion raqamli texnologiyalar bilan taʼminlangan yangi bojxona postlari chegaradan oʻtayotgan tovarlar va transport vositalarining qisqa vaqt ichida hamda ishonchli tekshiruvdan oʻtishini kafolatlaydi. Hozirgi vaqtda avtotransport vositalarining bojxona zonasiga kirgan paytidan boshlab barcha amallarning raqamli tizim orqali avtomatik tarzda nazorat qilinishi, rasmiylashtirish ishlariga sarflanadigan vaqtni sezilarli darajada tejashga sharoit yaratmoqda.
Oʻtkazilgan xalqaro tahlillar natijalari shuni koʻrsatadiki, Turkmaniston bojxona amaliyotlarini bajarish tezligi boʻyicha Markaziy Osiyo mintaqasida eng qisqa vaqt koʻrsatkichini qayd etib, yetakchi oʻrinlarga chiqdi. Yurtimizning tashqi savdo tovar aylanmasida va tranzit yuk tashishlarida strategik oʻringa ega boʻlgan «Artyk» va «Garabogaz» postlarining zamonaviy qiyofada ishga tushirilishi xalqaro hamda multimodal transport yoʻlaklarining oʻtkazuvchanlik quvvatini yanada oshirishga katta turtki beradi.
