Turkmanistonlik tadbirkor qovurilgan yer yong‘oqli karamel konfetlar ishlab chiqarishni boshladi

Turkmaniston Sanoatchilar va tadbirkorlar uyushmasi a’zosi, doshog‘uzlik tadbirkor Ismoil Ismoilov yaqinda qovurilgan yer yong‘oq (araxis) bilan to‘ldirilgan karamel konfetlar ishlab chiqarishni yo‘lga qo‘ydi. Bu haqda shanba kuni Turkmaniston rasmiy matbuoti xabar berdi.

Xabarda ta’kidlanishicha, tadbirkor 2020-yilda Sharqning mashhur shirinligi bo‘lgan nabot va nabot ko‘rinishidagi konfetlar ishlab chiqarishni boshlagan edi.

Doshog‘uz viloyatining Shabot tumanida joylashgan korxonada shoxli va kesma nabot, meva ta’mli karamel konfetlarning turli xillari hamda qovurilgan yer yong‘oqli karamel kabi shirinliklar ko‘p miqdorda ishlab chiqarilib, aholining ushbu mahsulotlarga bo‘lgan ehtiyoji to‘liq qondirilmoqda.

Ismoil Ismoilovning ishlab chiqarish sexida joriy yilning dastlabki ikki oyida sur’atlar sezilarli darajada oshdi: 5,8 tonna meva ta’mli karamel, 2,1 tonna qovurilgan yer yong‘oqli karamel va 3,6 tonna nabot ishlab chiqarildi.