Turkmanistonliklarga uy ichida gaz hidi kelganda rioya qilinishi kerak bo‘lgan xavfsizlik qoidalari eslatildi

“Ashgabatgaz” boshqarmasi “Neytralniy Turkmenistan” gazetasida turar-joy binolarida gaz hidi paydo bo‘lganda ko‘rilishi kerak bo‘lgan choralar tartibi haqida eslatma e’lon qildi va fuqarolarni belgilangan xavfsizlik qoidalariga rioya qilishga chaqirdi.

Idora tavsiyalariga ko‘ra, gaz hidi kelganda, gaz uskunalaridan foydalanishni to‘xtatish, barcha kranlarni yopish hamda xonani shamollatish uchun deraza va eshiklarni ochish kerak. Har qanday elektr jihozlarini tokdan uzish yoki tokka ulash qat’iyan man etiladi, chunki bu harakat yong‘inga sabab bo‘lishi mumkin.

Shuningdek, boshqarma gaz uskunalaridan foydalanishning asosiy qoidalarini eslatib o‘tdi. Xususan, gaz plitasidan faqat deraza darchasi ochiq bo‘lganida foydalanishga ruxsat beriladi. Uskunalarning uzoq vaqt ishlashi xonadagi is gazining miqdorini oshirib, zaharlanishga olib kelishi mumkin. Ishlab turgan gaz uskunalarini nazoratsiz qoldirmaslik kerak. Yosh bolalar va gazdan foydalanish qoidalari bilan tanish bo‘lmagan shaxslarning ulardan foydalanishiga yo‘l qo‘ymaslik lozim.

Gaz uskunalarini o‘zboshimchalik bilan o‘rnatish, joyini o‘zgartirish, ulash va ta’mirlash qat’iyan man etiladi. Uskunalarga xizmat ko‘rsatish bilan bog‘liq barcha savollar bo‘yicha fuqarolarga quyidagi manzil bo‘yicha “Ashgabatgaz” boshqarmasiga murojaat qilish maslahat beriladi: G. Burunow ko‘chasi, 7/2-uy, telefon raqami: 92-05-02.