Turkmanistonning 5 ta oliy o‘quv yurtida fors tili bo‘yicha malaka oshirish darslari boshlandi

16-fevral kuni Turkmanistonning 5 ta oliy o‘quv yurtida, ya’ni Magtimguli nomidagi Turkman davlat universiteti, Turkmaniston davlat energetika instituti, Turkmaniston Tashqi ishlar vazirligi Xalqaro munosabatlar instituti, Davlatmammet Azadi nomidagi Turkman milliy jahon tillari instituti va Seyitnazar Seydi nomidagi Turkman davlat pedagogika instituti o‘qituvchi va talabalari uchun eronlik mutaxassislar doktor Shahnaz Ahmadi Gader va doktor Tahmine Sheyxi ishtirokida fors tili va adabiyoti bo‘yicha malaka oshirish o‘quv darslari boshlandi.

Ushbu o‘quv mashg‘ulotlarining ochilishida Eron Islom Respublikasining Turkmanistondagi elchisi Ali Mojtaba Ruzbehani, Magtimguli nomidagi Turkman davlat universiteti rektori Orazgeldi Ovezsahedov, Eron Islom Respublikasining Turkmanistondagi madaniyat masalalari bo‘yicha maslahatchisi Abdolreza Abbasi, eronlik professor-o‘qituvchilar va kurs tinglovchilari ishtirok etdilar.

Magtimguli nomidagi Turkman davlat universiteti rektori Orazgeldi Ovezsahedov eronlik professorlar ishtirokida fors tili va adabiyoti bo‘yicha darslar o‘tkazilayotganidan mamnunligini bildirdi. U o‘quv kurslarini tashkil etish va o‘tkazishda ko‘rsatgan yordami uchun Eron Islom Respublikasining Turkmanistondagi elchixonasi va Madaniyat markaziga minnatdorchilik bildirdi hamda ushbu darslar o‘tgan oyda Eron elchisi va madaniyat maslahatchisining turkman universitetlari bilan uchrashuvi natijasi ekanini ta’kidladi. Shuningdek, u eronlik professorlardan ishtirokchilarning darslardagi faolligi, fors tilini o‘rganishdagi sa’y-harakatlari va berilgan bilim dasturini o‘zlashtirish darajasiga baho berishni hamda imtihon olishni so‘radi.

Eron Islom Respublikasining Turkmanistondagi madaniyat masalalari bo‘yicha maslahatchisi Abdolreza Abbasi Saadiy jamg‘armasiga va ikki davlat rahbarlariga 5 ta universitet o‘qituvchi va talabalari ishtirokida o‘quv darslarini o‘tkazish bo‘yicha kelishuv va yordam uchun minnatdorchilik bildirib, eronlik professorlarni tanishtirdi. U ushbu tajribali professorlarning ishtiroki o‘qituvchi va talabalarning bilim darajasini oshirishda katta qadam bo‘lishini hamda Eron va Turkmaniston o‘rtasidagi madaniy va ilmiy aloqalarga muhim ta’sir ko‘rsatishini aytdi. Kelgusida Saadiy jamg‘armasi va Turkmaniston universitetlari bilan hamkorlikda bunday kurslarni uzoq muddatli o‘tkazishga, shuningdek, turkman professor va talabalari uchun Eron va Turkmanistonda malaka oshirish kurslarini tashkil etishga tayyorligini bildirdi.ş

Eronlik professorlar doktor Shahnaz Ahmadi Gader va doktor Tahmine Sheyxi o‘z chiqishlarida elchixonaning Madaniyat markazi va universitetlarga minnatdorchilik bildirdilar hamda fors tili va adabiyoti o‘qituvchi va talabalari uchun kursni o‘tkazishning batafsil rejasi haqida gapirib berdilar. Ular ushbu o‘n kun davomida ishtirokchilarning bilim darajasi va fors tilida so‘zlashish qobiliyatini oshirish, shuningdek, o‘qituvchilarga yangi o‘qitish uslublarini o‘rgatish orqali fors tili ta’limini takomillashtirishga harakat qilishlarini aytdilar.

So‘ngra tadbir ishtirokchilari o‘quv darslari uchun mo‘ljallangan ikkita xona va dam olish xonasini ko‘zdan kechirib, u yerda yaratilgan sharoitlar bilan yaqindan tanishdilar.

Ta’kidlash joizki, fors tili va adabiyoti bo‘yicha malaka oshirish kurslarida qatnashayotgan o‘qituvchi va talabalar o‘quvning so‘nggi kuni o‘tilgan mavzular bo‘yicha imtihon topshiradilar. Barcha ishtirokchilarga Eron Islom Respublikasining Madaniyat markazi tomonidan bilim darajasi ko‘rsatilgan sertifikatlar topshiriladi. O‘quv darslari 2026-yilning 16-26 fevral kunlari oralig‘ida davom etadi.