Xalqaro gumanitar fanlar va rivojlanish universitetida YIning “Yevropa ufqlar” dasturi bo‘yicha tadbir o‘tkazildi

Xalqaro gumanitar fanlar va rivojlanish universitetida Yevropa Ittifoqining tadqiqotlar va innovatsiyalarni moliyalashtirish bo‘yicha “Yevropa ufqlar” (Horizon Europe) dasturiga bag‘ishlangan axborot sessiyasi tashkil etildi.

Uchrashuv Yevropa Komissiyasining “Global Service Facility” (GSF) idorasi vakili Kseniya Savchenko ishtirokida o‘tkazilib, u tinglovchilarga “Yevropa ufqlar” dasturining 2026–2027-yillar uchun ish rejalari va chora-tadbirlari haqida keng ko‘lamli va batafsil sharh taqdim etdi.

Ekspert ishtirokidagi tadbir ilmiy hamjamiyat vakillariga YI dasturining tuzilishi, tadqiqotlar va innovatsiyalarni moliyalashtirish imkoniyatlari, mamlakatimizning ushbu dasturdagi ishtiroki, shuningdek, Markaziy Osiyo mamlakatlari olimlari va innovatsiyalar bilan shug‘ullanuvchi mutaxassislari uchun shartlar va qoidalar haqidagi bilimlarini sezilarli darajada kengaytirish imkonini berdi.

Sessiya yakunida mavzu bo‘yicha atroflicha fikr almashildi va YI dasturi vakili ishtirokchilarni qiziqtirgan barcha savollarga javob berdi.

“Yevropa ufqlar” (Horizon Europe) dasturi iqlim o‘zgarishi, barqaror rivojlanish, energetika, sog‘liqni saqlash va YI iqtisodiyotining raqobatbardoshligini oshirish kabi global vazifalarni hal qilishga qaratilgan.

Dastur ushbu yo‘nalishlar bo‘yicha tadqiqotlar va innovatsiyalarni qo‘llab-quvvatlash uchun investitsiyalarni ko‘zda tutadi hamda YI davlatlari, unga birlashgan ishtirokchi davlatlar, shuningdek, Markaziy Osiyo mamlakatlari olimlari va novatorlari uchun ochiqdir.

“Global Service Facility” (GSF) ushbu dasturning bir qismi va xizmat ko‘rsatish vositasi bo‘lib, u “Yevropa ufqlar” missiyalari doirasida xalqaro hamkorlikni qo‘llab-quvvatlashga, dastur tashabbuslarini samarali joriy etish va targ‘ib qilishga yo‘naltirilgan.