Yaqin kelajakda turkman-turk savdo aylanmasi 5 milliard dollarga yetkaziladi

Turkiya savdo vaziri Omer Bolat yaqin kelajakda turkman-turk savdo aylanmasini 5 milliard AQSh dollariga yetkazish asosiy maqsad ekanligini ta’kidladi. U bu haqda Ashxobodda o‘tkazilayotgan Turkiya eksport tovarlari ko‘rgazmasidagi chiqishida ma’lum qildi.

Turkiya eksport tovarlari ko‘rgazmasi doirasida Ashxobodga tashrif buyurgan Turkiya savdo vaziri Omer Bolat Turkmaniston Vazirlar Mahkamasi Raisining o‘rinbosari No'kerguli Atagulyyev bilan uchrashdi.

O. Bolat o‘tkazilgan uchrashuv haqida o‘zining ijtimoiy tarmoqdagi sahifasida xabar berdi:

«Qardosh Turkmanistonga amalga oshirgan tashrifimiz doirasida Turkmaniston Vazirlar Mahkamasi Raisining o‘rinbosari, janob No'kerguli Atagulyyev bilan ikki tomonlama uchrashuv o‘tkazdik. Turkmaniston bilan savdo va iqtisodiy sohalarga alohida e’tibor qaratish, jumladan, o‘zaro ko‘rgazma tadbirlarini tashkil etish va ularda ishtirok etish, investitsiya forumlari, tarmoq panellari hamda ikki tomonlama ishbilarmonlik uchrashuvlarini tashkil etish bo‘yicha kelishib oldik», — deb yozadi Turkiya savdo vaziri.

Ta’kidlanishicha, tomonlar uchrashuvda savdo-sotiqdan qurilishgacha, qo‘shma investitsiyalardan energetikagacha, transportdan turizmgacha iqtisodiyotning barcha yo‘nalishlarida ikki davlat munosabatlarini yanada rivojlantirish yo‘lida birgalikda ishlashga kelishib oldilar.