YeI va Turkmaniston 2026-yil uchun hamkorlik ustuvorliklarini belgilab oldi

Seshanba kuni Turkmaniston poytaxti Ashxobod shahrida Yevropa Ittifoqi va Turkmaniston o‘rtasidagi hamkorlik yakunlari hamda 2026-yilga mo‘ljallangan hamkorlik yo‘nalishlariga bag‘ishlangan matbuot anjumani bo‘lib o‘tdi.

Tadbir ishtirokchilari qo‘shma kun tartibi iqlim o‘zgarishiga moslashish va atrof-muhitni muhofaza qilish, energiya samaradorligini oshirish, kiberxavfsizlik, transport infratuzilmasini rivojlantirish, investitsiyalarni jalb qilish hamda xususiy sektorni qo‘llab-quvvatlash kabi keng ko‘lamli sohalarni qamrab olishini ta’kidladilar. Tomonlar siyosiy, iqtisodiy, madaniy va gumanitar sohalarda hamkorlikni yanada kengaytirishga tayyor ekanliklarini tasdiqladilar.

YeI vakillari qo‘shma tashabbuslarni amalga oshirishda ittifoqqa a’zo davlatlarning hissasini alohida qayd etdilar. Shuningdek, aloqalar milliy hamkorlar, ishbilarmon doiralar va xalqaro moliya institutlari ishtirokida “Team Europe” formatida rivojlanayotgani ta’kidlandi.

2026-yil uchun bir qator amaliy tadbirlar rejalashtirilgan. Mart oyida Ashxobodda Turkmaniston Mejlisi va Yevropa Parlamenti o‘rtasidagi parlamentlararo muloqot, inson huquqlari bo‘yicha navbatdagi muloqot hamda 26-martga belgilangan “Turkmaniston — YeI” biznes-forumi o‘tkazilishi ko‘zda tutilgan.

Turkmaniston va Yevropa Ittifoqi o‘rtasidagi hamkorlik Savdo va unga doir masalalar bo‘yicha vaqtinchalik Bitim asosida amalga oshirilmoqda. Ushbu hujjat 2010-yil avgust oyida, hamkorlik to‘g‘risidagi Bitim Yevropa Parlamenti tomonidan ratifikatsiya qilinishidan oldin kuchga kirgan.