Yevropa Investitsiya Banki 2026-yilda Markaziy Osiyodagi faoliyatini kengaytirishni rejalashtirmoqda

Yevropa Investitsiya Banki (YIB) 2025-yilni Yevropa Ittifoqining Markaziy Osiyo mamlakatlari bilan munosabatlarida muhim bosqich deb hisoblaydi va 2026-yilda mintaqadagi faoliyatini kuchaytirishni rejalashtirmoqda. Bu haqda YIBning mintaqaviy bo‘limi rahbari Edwardas Bumšteynas ma’lum qildi, deya xabar beradi “Trend” agentligi.

Uning ta’kidlashicha, 2025-yilda bank Qozog‘iston, Qirg‘iziston, Tojikiston va O‘zbekistonda moliyaviy qo‘llab-quvvatlashni kengaytirdi. Ushbu mablag‘lar barqaror rivojlanish, yo‘l qurilishi va boshqa infratuzilma loyihalari, raqamli tizimlarni rivojlantirish hamda iqlim o‘zgarishiga qarshi choralarni kuchaytirishga yo‘naltirildi. Loyihalar Yevropa Ittifoqining “Global Gateway” dasturi doirasida amalga oshirilmoqda.

Shuningdek, Edwardas Bumšteynas Yevropa Investitsiya Bankining Turkmaniston bilan asosiy bitim bo‘yicha muzokaralarda sezilarli siljishga erishganini ta’kidladi. Bu bankning Turkmanistonda faoliyat yuritishiga imkon yaratadi. Bundan tashqari, 2026-yilda bankning birinchi mintaqaviy ofisini Toshkent shahrida ochish rejalashtirilmoqda.

Yevropa Investitsiya Banki Markaziy Osiyoning Yevropa Ittifoqi uchun transport aloqalari, energetik xavfsizlik va iqlim o‘zgarishi masalalarida muhim ahamiyatga ega ekanini qayd etadi.

Yevropa Investitsiya Banki 1958-yilda tashkil etilgan bo‘lib, uning bosh qarorgohi Lyuksemburg shahrida joylashgan. U Yevropa Ittifoqining moliyaviy instituti bo‘lib, barqaror iqtisodiy rivojlanish, integratsiya va infratuzilma rivojiga qaratilgan loyihalarni uzoq muddatli moliyalashtirish orqali nafaqat YI mamlakatlarini, balki boshqa davlatlarni ham qo‘llab-quvvatlaydi.