Fransiyaning g‘aroyib loyihasi: Ham yo‘lda, ham relsda harakatlanuvchi "Ferromobil"

Fransiyada foydalanishdan chiqqan temir yo‘llardan foydalanish maqsadida maxsus transport vositasi ishlab chiqildi. SiCef nomli firma ham yerda, ham relslar ustida harakatlana oladigan kichik mikroavtobuslar ishlab chiqarishni maqsad qilgan. “Ferromobil” deb nomlangan ushbu ulov, asosan, avtomobillardan ko‘p foydalaniladigan qishloq joylarida qo‘llash uchun mo‘ljallangan. Mamlakat hududidagi foydalanilmayotgan temir yo‘llarning umumiy uzunligi 5 ming 700 kilometrga yetadi. Muhandislar ulovning relsga oson chiqishi va tushishi uchun qo‘shimcha uskunalar ishlab chiqdilar. Buning uchun “Peugeot e-Traveller” mikroavtobusi tanlab olingan. Shunday qilib, ushbu ulovlarni ham yo‘lda, ham temir yo‘lda haydash mumkin bo‘ladi. G‘aroyib transport, birinchi navbatda, Overn mintaqasidagi Kurper—Vertolaye oralig‘ida sinovdan o‘tkaziladi. Ijobiy natija bergan taqdirda, Oksitaniya, Brittani va Yangi Akvitaniya kabi boshqa hududlarda ham foydalanishga topshiriladi. 8 o‘rinli ferromobillarni ijaraga olish mumkin bo‘ladi. Shuningdek, ushbu ulovlar bilan temir yo‘lda yo‘lovchi tashish yo‘lga qo‘yiladi. Rels ustida bo‘lgan vaqtda transport vositasi haydovchisiz, mustaqil harakatlanadi. Odatiy “Peugeot e-Traveller” ulovlari to‘liq elektr energiyasi bilan ishlaydi. Katta oilalar uchun mo‘ljallangan ushbu avtomobil bir marta quvvatlanish bilan 330–350 kilometr yo‘l bosa oladi.