«Arkadag» futbol toparynyň tälimçilerine, türgenlerine we janköýerlerine

Eziz watandaşlar!
Hormatly «Arkadag» futbol toparynyň tälimçileri we türgenleri!

Sizi Halkara parahatçylyk we ynanyşmak ýylynda gazanylan sport üstünligi — «Arkadag» futbol toparynyň Aziýanyň Futbol konfederasiýasynyň Çagyryş ligasynyň final duşuşygynda ýeňiş gazanyp, çempion bolmagy bilen tüýs ýürekden gutlaýaryn.

Garaşsyzlyk ýyllarynda ýurdumyzda bedenterbiýäni we sporty ösdürmek, ilatyň, aýratyn-da, ýaşlaryň arasynda sagdyn durmuş ýörelgelerini ornaşdyrmak, beden taýdan sagdyn, ruhubelent ýaşlary terbiýeläp ýetişdirmek boýunça uly özgertmeler durmuşa geçirildi. Eziz Diýarymyzda dünýä ölçeglerine laýyk gelýän sport toplumlary, mekdepleri, stadionlar we ençeme sport desgalary gurlup ulanmaga berildi. Netijede, halkymyzyň köpçülikleýin bedenterbiýe bilen giňden meşgullanmagy, ýaşlarymyzyň sportuň dürli görnüşleri boýunça täze üstünlikleri gazanmagy üçin berk binýat döredildi.

Ýurdumyzda ençeme iri sport ýaryşlary guraldy. Üstünlikli geçirilen Ýapyk binalarda we söweş sungaty boýunça V Aziýa oýunlary, «Amul — Hazar» halkara awtorallisi, Agyr atletika boýunça dünýä çempionaty, Kuraş boýunça dünýä çempionaty, tennis boýunça Merkezi Aziýanyň toparlaýyn birinjiligi, hokkeý boýunça halkara ýaryş Türkmenistanyň hem-de dünýä sportunyň taryhynda täze sahypalary açdy. Ykbalyny sporta baglan türgenlerimiz diňe bir ýurdumyzda däl, eýsem, sebit we halkara derejedäki ýaryşlarda hem ata Watanymyzyň sport abraýyny belende göterip, watansöýüjiligiň, gaýduwsyzlygyň, hakyky ussatlygyň ajaýyp nusgasyny görkezýärler.

Hormatly adamlar!

Garaşsyz, hemişelik Bitarap Türkmenistanyň başlangyjy boýunça Birleşen Milletler Guramasynyň Baş Assambleýasynyň Kararnamasy esasynda 2025-nji ýylyň «Halkara parahatçylyk we ynanyşmak ýyly» diýlip yglan edilmegi bilen, parahatçylygyň ilçisi bolup durýan sporty ösdürmek ugrunda netijeli işler durmuşa geçirilýär. Döwletimiz Halkara Olimpiýa Komitetiniň, Aziýanyň Olimpiýa Geňeşiniň agzasy hökmünde Olimpiýa hereketiniň ösdürilmegine mynasyp goşant goşýar. Bedenterbiýe we sport jemgyýetiň sagdynlygyny üpjün edýän, halklary hem-de döwletleri jebisleşdirýän uly güýçdür. Sport bar ýerinde parahatçylyk, bagtyýarlyk, abadançylyk, gülläp ösüş höküm sürýär. Sportuň üsti bilen dost-doganlyk gatnaşyklary berkidilýär.

Türkmenistanyň başlangyjy bilen Birleşen Milletler Guramasynyň Baş Assambleýasynyň 3-nji iýuny «Bütindünýä welosiped güni» diýip yglan etmek hakynda, şeýle hem «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamalary biragyzdan kabul edildi. Türkmenistan 2023 — 2027-nji ýyllar üçin ÝUNESKO-nyň Bedenterbiýe we sport boýunça hökümetara komitetiniň düzümine saýlanyldy. 2024-nji ýylda Birleşen Milletler Guramasynyň Baş Assambleýasynyň 78-nji sessiýasynda Türkmenistanyň başlangyjy bilen hem-de Milletler Bileleşigine agza döwletleriň biragyzdan goldamagynda «Birleşen Milletler Guramasynyň oýunlary» atly Kararnama kabul edildi.

2024-nji ýylda geçirilen Garaşsyz Döwletleriň Arkalaşygynyň Hökümet Baştutanlarynyň geňeşiniň degişli Çözgüdine laýyklykda, Aşgabat şäheri «Arkalaşygyň täze sport mümkinçilikleriniň şäheri» diýlip yglan edildi. Şeýle hem Aşgabatdaky Olimpiýa şäherçesiniň Tennis toplumy Aziýanyň Tennis federasiýasy tarapyndan «Tennis boýunça Aziýa sebitiniň okuw-türgenleşik merkezi» diýlip ykrar edildi. Bularyň ählisi ata Watanymyzyň Ýer ýüzünde parahatçylygy we dostlugy pugtalandyrmaga goşýan goşandynyň ykrarnamasy bolup durýar.

Gadyrly sport söýüjiler!

Eziz Watanymyzyň hemişelik Bitaraplygynyň 30 ýyllyk baýramynyň toýlanýan ýylynda hem türgenlerimiz sportuň dürli görnüşleri boýunça gazanýan uly üstünlikleri bilen Berkarar döwletiň täze eýýamynyň Galkynyşy döwründe ýurdumyzyň sport abraýyny has-da belende göterýärler. Halkara parahatçylyk we ynanyşmak ýylynyň ilkinji aýynda «Galkynyş» milli at üstündäki oýunlar toparynyň agzalary — edermen ýigitlerimiz we gyzlarymyz Monako Knýazlygynda geçirilen Monte-Karlo halkara sirk sungaty festiwalynda türkmen tuguny belentde parladyp, Altyn baýraga hem-de ýörite baýraklara mynasyp boldular. 2025-nji ýylyň aprel aýynda Aşgabat şäherindäki Olimpiýa şäherçesiniň Başa-baş söweş sungaty sport toplumynda geçirilen sportuň milli we guşakly alyş göreşi boýunça halkara ýaryş hem uly üstünliklere beslendi. 13 döwletiň gatnaşmagynda geçirilen bu halkara ýaryşda biziň türgenlerimiz 28 medala mynasyp bolup, ýurdumyzyň halkara sport abraýyny ýene-de belende galdyrdylar. Ýakynda «Arkadag» futbol toparynyň uly ýeňiş gazanyp, Aziýanyň Futbol konfederasiýasynyň Çagyryş ligasynyň çempiony bolmagy bolsa Diýarymyzda ýokary netijeli sporty we Olimpiýa hereketini ösdürmek ugrunda alnyp barylýan özgertmeleriň halkara derejede rowaçlanýandygynyň subutnamasy boldy.

Hormatly «Arkadag» futbol toparynyň tälimçileri we türgenleri!

Türkmenistanda futboly ösdürmekde we ony giňden ýaýratmakda halkara tagallalaryň birleşdirilmegine möhüm ähmiýet berilýär. Häzirki wagtda Halkara Futbol federasiýasy (FIFA) we Aziýanyň Futbol konfederasiýasy (AFK) bilen hyzmatdaşlykda ýurdumyzda futboly mundan beýläk-de ösdürmek babatda bilelikdäki işler amala aşyrylýar. Türkmen halkynyň Milli Lideri Gahryman Arkadagymyzyň pähim-paýhasy bilen dörän Arkadag şäherinde hem sportuň dürli görnüşleri bilen bir hatarda, futboly ösdürmäge-de uly üns berilýär. Bu ýerde halkara ölçeglere laýyk gelýän köpugurly sport toplumy, sport merkezi we 10 müň orunlyk stadion gurlup ulanmaga berildi.

Türkmen sportunyň dünýädäki abraýynyň arşa galmagynda uly işleri alyp barýan Gahryman Arkadagymyzyň başlangyjy bilen 2023-nji ýylda «Arkadag» futbol toparynyň döredilmegi ýurdumyzyň sport durmuşynda uly waka boldy. «Arkadag» futbol toparynyň 2023-2024-nji ýyllarda Türkmenistanyň çempionatynyň duşuşyklarynda we Türkmenistanyň Kubogy hem-de Naýbaşy kubogy ugrundaky bäsleşiklerde üstünlikli çykyş edip, ajaýyp ýeňişleri gazanmagy bu futbol toparynyň geljeginiň uludygyny aýdyň görkezdi.

Hormatly adamlar!

Bu gün biz taryhda behişdi bedewleriň mesgeni bolan, häzirki wagtda gülläp ösýän Arkadag şäherinde pähim-paýhasly ata-babalarymyzyň «At agynan ýerde toý bolar» diýen atalar sözüniň rowaçlanýandygynyň şaýady bolýarys. Gahryman Arkadagymyzyň «Arkadag» futbol toparynyň tälimçileri we türgenleri bilen duşuşyp, olara: «Ýeňiş gazanmak siz bilen, alkyşlamak biz bilen!» diýip, ak pata bermegi ýigitlerimiziň ruhubelentligini, ýeňşe bolan ynamyny has-da artdyrdy. «Arkadag» futbol topary bildirilen uly ynamdan ruhlanyp, uly ýeňiş gazandy. Aziýanyň Futbol konfederasiýasynyň Çagyryş ligasynyň Kubogyna mynasyp bolup, ýurdumyzyň halkara sport abraýyny has-da belende göterdi. Eziz Watanymyzyň baýdagyny al-asmanda parladyp, Türkmenistanyň abraýyny ýene-de bir gezek belende galdyrdy.

Eziz watandaşlar!
Hormatly «Arkadag» futbol toparynyň tälimçileri we türgenleri!

Sizi «Arkadag» futbol toparynyň üstünlikli çykyş edip, türkmen futbolynyň taryhynda ilkinji gezek halkara derejede geçirilen abraýly ýaryşda çempion bolmagy bilen ýene-de bir gezek tüýs ýürekden gutlaýaryn. Size berk jan saglyk, abadan we bagtyýar durmuş, berkarar Watanymyzyň sport abraýyny has-da artdyrmak ugrunda alyp barýan işleriňizde uly üstünlikleri arzuw edýärin.

Türkmenistanyň Prezidenti

Serdar BERDIMUHAMEDOW.