Aşgabatda 90-a golaý iş berijiniň gatnaşmagynda boş iş orunlarynyň ýarmarkasy geçirildi

Türkmenistanyň paýtagtynda Saparmyrat Türkmenbaşy şaýolunyň ugrunda ýerleşýän Senagatçylar we telekeçiler birleşiginiň binasynda boş iş orunlarynyň ýarmarkasy geçirildi. Bu barada «Neýtralnyý Turkmenistan» gazeti habar berdi.

Çärä 89 sany gurama, kärhana, kompaniýa we hususy telekeçi gatnaşyp, jemi 3,83 müň boş iş ornuny hödürledi. Ýarmarkanyň netijeleri boýunça takmynan 100 adam işe ugrukdyryldy, 54 sany iş gözleýji bolsa çäräniň geçirilen gününde gönüden-göni işe kabul edildi.

Çäräni guraýjylar hökmünde Aşgabat şäheriniň Zähmet we ilaty iş bilen üpjün etmek müdirligi, paýtagtymyzyň Bagtyýarlyk, Berkararlyk, Büzmeýin we Köpetdag etraplarynyň Zähmet we iş bilen üpjün etmek bölümleri, şeýle hem Türkmenistanyň Senagatçylar we telekeçiler partiýasynyň şäher komiteti çykyş etdi.

Iş berijileriň hatarynda «Petronas» kompaniýasy (13 boş iş orny), «Bahar» tikinçilik birleşigi (19 boş iş orny), «Awtoýoly Group» holdingi (takmynan 40 sany inžener-tehniki we işçi hünärleri boýunça boş iş orny) bar. Şeýle-de boş iş orunlaryny Demir ýol ulaglary ministrligi, «Türkmenenergo» birleşiginiň merkezi edarasy, Döwlet sirki, ýaşaýyş-jaý we jemagat hojalygy hem-de saglygy goraýyş ulgamynyň kärhanalary hödürlediler.

Iş gözleýänler türkmen we rus dillerinde taýýarlanan maglumat diwarlyklarynda hödürlenýän boş iş orunlary bilen tanyşmaga, kompaniýalaryň wekilleri bilen söhbetdeş bolmaga hem-de söhbetdeşliklerden geçmäge mümkinçilik aldylar. Gatnaşyjylaryň ep-esli bölegi ýaşlar bolup, olaryň hatarynda ýakynda mekdebi tamamlan uçurymlar hem bar.

Türkmenistanyň Senagatçylar we telekeçiler birleşiginiň binasynda boş iş orunlarynyň ýarmarkalary yzygiderli esasda geçirilýär.