Diplomatik gadamlar: GDA-nyň Liderleriniň Sammite taýýarlygy Türkmenistanda dowam eder
Diplomatik gadamlar: GDA-nyň Liderleriniň Sammite taýýarlygy Türkmenistanda dowam eder
2026-njy ýylyň 17-nji aprelinde Moskwada Garaşsyz Döwletleriň Arkalaşygynyň (GDA) Daşary işler ministrleriniň geňeşiniň nobatdaky mejlisi geçirildi. Bu duşuşyk diňe bir Arkalaşygyň çägindäki hyzmatdaşlygy berkitmek bilen çäklenmän, eýsem, geljekki taryhy duşuşyklaryň senesini we ýerini hem kesgitledi.
Mejlisiň dowamynda halkara derejeli möhüm meseleler ara alnyp maslahatlaşyldy we aşakdaky esasy çözgütler kabul edildi:
- GDA-nyň çäginde bilim ulgamy boýunça iki sany täze binýatlyk guramany döretmek barada ylalaşyldy.
- Adamyň älem giňişligine ilkinji uçuşynyň 65 ýyllygyna bagyşlanan Bilelikdäki beýannama tassyklanyldy. Onda kosmosyň diňe parahatçylykly maksatlar üçin we ähli halklaryň bähbidine ulanylmalydygy nygtaldy.
«TASS» agentliginiň habar bermegine görä, gatnaşyjylar GDA-nyň Döwlet Baştutanlarynyň geňeşiniň we Hökümet Baştutanlarynyň geňeşiniň tassyklamagyna beriljek birnäçe resminamalaryň taslamalaryna hem seretdiler.
GDA-nyň Baş sekretary Sergeý Lebedewiň habar bermegine görä, Arkalaşygyň daşary işler ministrleriniň nobatdaky duşuşygy 7-nji oktýabrda Türkmenistanda geçiriler.
Bu duşuşyk 2026-njy ýylyň 9-njy oktýabrynda meýilleşdirilen GDA-nyň Döwlet Baştutanlarynyň geňeşiniň (sammitiniň) öňüsyrasynda wajyp taýýarlyk tapgyry bolar. Türkmenistanyň daşary işler ministriniň orunbasary Ahmet Gurbanowyň belleýşi ýaly, bu uly göwrümli syýasy çäre Hazar deňziniň merjeni bolan «Awaza» milli syýahatçylyk zolagynda bolar.
GDA-nyň ýokary derejeli duşuşyklarynyň Türkmenistanda, hususan-da Awazada geçirilmegi ýurdumyzyň sebitde parahatçylygy we durnuklylygy üpjün edýän netijeli meýdançadygyny subut etmek bilen, Bitarap döwletimiziň halkara hyzmatdaşlygyndaky barha artýan ornuny hem-de ýokary derejeli guramaçylyk we myhmansöýerlik mümkinçiliklerini dünýä jemgyýetçiligine ýene-de bir gezek aýdyň görkezer.
