Ýeňiş gollary soňky minutlarda: «Ahal» we «Merw» utuklaryny ýokary göterdi

Türkmenistanyň futbol boýunça çempionatynyň Ýokary ligasynyň 6-njy tapgyryna Aşgabatda we Maryda geçirilen dartgynly duşuşyklar bilen badalga berildi. Tapgyryň açylyş oýunlarynda «Ahal» we «Merw» toparlary soňky minutlarda uran gollary arkaly möhüm ýeňişleri gazanmagy başardylar.

Mary şäherinde ýerli «Merw» topary paýtagtyň «Köpetdagyny» kabul etdi. Duşuşygyň dowamynda taraplar birek-biregiň derwezesinden bir gezek pökgi geçirmegi başardylar. 32-nji minutda Guwanç Berdimyradowyň goluna, myhmanlar 47-nji minutda Batyr Aşyrowyň takyk urgysy bilen jogap berdiler.

Oýnuň ykbaly esasy wagta goşulan minutlarda çözüldi. 95-nji minutda Guwanç Berdimyradow özüniň ikinji golyny girizip, toparyna 2:1 hasabyndaky ýeňşi getirdi.

Aşgabadyň köpugurly stadionynda geçirilen oýunda «Ahal» bilen «Nebitçi» duşuşdy. Duşuşygyň esasy wagtynda hasap açylmady, hatda 90-njy minutda Ýagşymuhammet Göwşudowyň jerime urgusyndan soň pökgi derwezäniň ýokarky agajyna degip yzyna gaýtdy.

Duşuşygyň 98-nji minutynda myhmanlaryň goragçysy Begmyrat Arbatowyň jerime meýdançasynyň içinde topy el bilen oýnamagy netijesinde «Nebitçiniň» derwezesine penalti bellenildi. Pökgi nokadyna gelen Süleýman Mirzoýew mümkinçiligi elden bermän, «Ahala» 1:0 hasabyndaky ýeňşi we gymmatly 3 utugy peşgeş berdi. Bu netije bilen «Ahal» 11 utuk toplap, wagtlaýynça ikinji orna geçdi.