Hero Training 2026: Türkmenistandan başlangyçlar Draper University halkara akseleratoryna arza tabşyryp bilerler

Astana Hub, IT Park Uzbekistan bilen bilelikde Draper University bilen hyzmatdaşlykda amala aşyrylýan Hero Training maksatnamasynyň bäşinji tapgyryna gatnaşmak üçin arzalaryň kabul edilip başlanandygyny yglan edýär. Şu ýyl maksatnamaga Gazagystandan, Özbegistandan, Gyrgyzystandan, Täjigistandan, Türkmenistandan, Gruziýadan we Azerbaýjandan 11 sany startap gatnaşar.

Gatnaşmak üçin arzalar 2026-njy ýylyň 7-nji martyna çenli şu salgy boýunça kabul edilýär.

Hero Training – bu Kremniý jülgesinde işjeň taýýarlygy üpjün edýän, telekeçiler üçin niýetlenen bäş hepdelik okuwdyr. Gatnaşyjylar 25–30 ýurduň bazarlaryna çykmak mümkinçiligini alýarlar, amaly sapaklary, strategik maslahatlary, maýadarlar bilen AMA-duşuşyklary (sorag-jogap duşuşyklaryny), öňdebaryjy telekeçileriň halypalygyny geçýärler, şeýle hem netwoking-çärelerine gatnaşýarlar. Maksatnamanyň esasy bölekleriniň biri bolan «deňiz pişikleri (SEALs) bilen diri galmak hepdesi» – durnuklylygy, liderligi we toparlaýyn netijeliligi ösdürýän amalyýetdir.

«Hero Training amala aşyrylan ýyllarynyň dowamynda Merkezi Ýewraziýanyň tehnologik startaplary üçin esasy halkara akselerasiýa maksatnamalarynyň birine öwrüldi. Bu döwürde maksatnama 260-dan gowrak arza çekdi, olardan 41 taslama Kremniý jülgesindäki Draper University-niň kampusynda oflaýn-akselerasiýany üstünlikli geçdi. Maksatnamany uçurym bolanlar eýýäm 3 million dollardan gowrak maýa goýum çekdiler, hyzmatdaşlyk şertnamalaryny baglaşdylar we halkara bazarlarynda satuwlary ýola goýdular. Gatnaşyjylaryň we başlangyçlaryň geriminiň giňelýän geografiýasy Merkezi Aziýa, Kawkaz we Türkiýe ýurtlaryny, şeýle hem ABŞ-ny, şol sanda Maýami bazaryna çykmagy we amerikan uniwersitetleri hem-de kompaniýalary bilen hyzmatdaşlygy öz içine alýar. Bu bolsa maksatnamanyň bütindünýä ösüşe gönükdirilen başlangyçlar üçin amaly gymmatyny tassyklaýar» diýip, Astana Hub-yň dolandyryjy direktory Tanat Uskembaýew belledi.

Hero Training maksatnamasyna gatnaşmak üçin MVP (iň pes ýaşaýyş ukybyna eýe bolan önüm) we ondan ýokary tapgyrda işleýän önümi bolan tehnologik başlangyçlar arza tabşyryp bilerler. Maksatnama gatnaşyjylara taslamanyň ösüşini çaltlaşdyrmaga we Draper Ecosystem-iň telekeçileriniň hem-de bilermenleriniň ýolbaşçylygynda ABŞ-nyň bazaryna çykmaga taýýarlanmaga, şeýle hem halkara maýadarlarynyň we hyzmatdaşlarynyň ünsüni çekmäge mümkinçilik berýär.

Aýratyn Hero Training akselerasiýa maksatnamasy we onuň birinji, ikinji, üçünji hem-de dördünji tapgyrlaryna gatnaşyjylar barada giňişleýin maglumaty astanahub.com platformasyndan alyp bilersiňiz.

Draper Ecosystem – bu innowasion ekoulgamy goldamak üçin öňdebaryjy fasilitatorlary we halypalaryň, pudaklaýyn bilermenleriň, hyzmatdaşlaryň hem-de maýadarlaryň deňsiz-taýsyz toruny hödürlemek arkaly zehinleri, bilermenleri we maýadarlary birleşdirmäge täzeçil çemeleşmedir. Draper University-niň esaslandyryjysy ABŞ-nyň iň iri wençur maýadary Tim Dreýperdir.