Kolossus 2-niň hasaplaýyş kuwwaty 2 GWt-a çenli ýokarlanar: Ilon Mask xAI infrastrukturasyny giňeldýär

Ilon Mask tarapyndan döredilen xAI kompaniýasy emeli aň Grok-y öwretmek üçin zerur bolan hasaplaýyş infrastrukturasyny giňeltmek maksady bilen üçünji binany satyn aldy. Täze bina MACROHARDRR adyny aldy.

Goşmaça binanyň satyn alynmagy Kolossus 2 superkompýuter klasteriniň umumy hasaplaýyş kuwwatyny takmynan 2 gigawatt derejesine çenli ýokarlandyrmaga mümkinçilik berer. Bu ýerde gürrüň hasaplaýyş öndürijiligi (FLOPS) barada däl-de, hasaplaýyş ulgamynyň sarp edýän umumy elektrik kuwwaty barada gidýär.

Täze ýerde dünýäde iň uly hasap edilýän Kolossus 2 superkompýuteriniň bölekleri ýerleşdiriler. Geljekde kompaniýa klasteri bir million grafiki prosessora (GPU) çenli giňeltmegi meýilleşdirýär, bu bolsa emeli aň infrastrukturasynyň taryhynda görlüp-eşidilmedik dereje bolar.

The Information neşiriniň maglumatlaryna görä, xAI täze satyn alnan ammary doly derejeli maglumat merkezine 2026-njy ýylda öwürmäge başlar. Şeýle-de täze maglumat merkezi we Kolossus 2 xAI tarapyndan gurulýan tebigy gaz bilen işleýän elektrik stansiýasynyň ýanynda, şeýle hem beýleki energiýa çeşmeleriniň golaýynda ýerleşýär.

Şol bir wagtyň özünde, emeli aň infrastrukturasynyň çalt giňeldilmegi daşky gurşawy goramak bilen meşgullanýan guramalaryň aladasyny döredýär. Tankytçylar maglumat merkezleriniň örän ýokary energiýa sarp edýändigini we olaryň daşky gurşawa ýetirip biljek täsirini belleýärler.

Ozal, sentýabr aýynda xAI kompaniýasy Kolossus superkompýuteriniň kuwwatyny 1,21 GWt derejesine çenli ýokarlandyrmak meýilnamalary barada habar beripdi. Häzirki meýilnamalar bolsa Grok emeli aň platformasynyň ösüşiniň has-da çaltlaşýandygyny görkezýär.