Kontakt linzalaryny 3D-printerde çap edip bolar: bary-ýogy 20 minut gerek
Vaterloo uniwersitetiniň (Kanada) gözlegçileri 3D-printer arkaly kontakt linzalaryny öndürmegiň innowasion tehnologiýasyny hödürlediler. Bu usul her bir näsagyň gözüniň perdesine doly laýyk gelýän optiki önümleri bary-ýogy 20 minutda ýasamaga mümkinçilik berýär. Gözlegiň netijeleri "Materials & Design" žurnalynda çap edildi.
Esasy üstünlik hökmünde göz üçin howpsuz, kislorody gowy geçirýän we 3D-printerde çap etmäge ýaramly ýörite gidrofil silikon oýlanyp tapyldy. 3D-çap etme prosesinde emele gelýän ownuk tekiz dällikleri çözmek üçin alymlar optiki häsiýetleri bozman, üstüni tekizleýän örän ýuka örtük tehnologiýasyny ullandylar. Häzirki wagtda işlenip düzülen tehnologiýa barlaghana synaglaryndan geçýär we döredijiler ony hakyky näsaglarda synap görmäge taýýarlyk görýärler.
