Hormatly Prezidentimiz Serdar Berdimuhamedowyň baştutanlygynda ýurdumyzyň welaýatlarynda oba hojalyk pudagyny düýpli kämilleşdirmäge, azyk howpsuzlygyny üpjün etmäge we agrotehniki kadalaryň berk berjaý edilişini güýçlendirmäge uly üns berilýär. Bellenilip geçilişi ýaly, «Garaşsyz, baky Bitarap Türkmenistan — bedew batly at-myrady mekany» ýylynda hem bu ugurda giň möçberli işler amala aşyrylýar. Şunuň bilen baglylykda Hormatly Prezidentimiziň beren tabşyryklaryndan ugur alyp, Lebap welaýat häkimliginde ýörite iş maslahaty geçirildi we onda bu wezipeleri durmuşa geçirmegiň ýollary giňden ara alyp maslahatlaşyldy.

Bugdaý ekişine taýýarlyk we galla meýdanlary

Geljek ýylyň bol galla hasylynyň düýbüni wagtynda we ýokary derejede tutmak maksady bilen, galla oragyndan boşan meýdanlarda sürüm hem-de tekizleýiş işleri gyzgyn depginde alnyp barylýar. Şeýle hem geljekki ekiş möwsüminde bökdençsiz ulanyljak oba hojalyk tehnikalaryny we ýokary hilli bugdaý tohumlaryny taýýarlamak boýunça zerur çäreler berjaý edilýär. Hünärmenler tarapyndan topragyň melioratiw ýagdaýyny gowulandyrmak we ony indiki ekişe taýynlamak ugrunda ähli mümkinçilikler ulanylýar.

Gowaça, şaly we gök-bakja ekinlerine ideg etmek

Welaýatyň gowaça ekilen meýdanlarynda agrotehniki kadalara berk laýyklykda hatarara bejergi, mineral dökünler bilen iýmitlendirmek, ösüş suwuny tutmak hem-de zyýankeşleriň ýüze çykmagynyň öňüni almak boýunça dowamly hem-de netijeli işler amala aşyrylýar. Ýurdumyzda gök-bakja önümleriniň öndürilýän möçberlerini has-da artdyrmak we azyk bolçulygyny pugtalandyrmak barada öňde goýlan wezipeleri üstünlikli berjaý etmek maksady bilen, güýzki ekişe hem taýýarlyk görülýär. Şaly ekilen meýdanlarda hem kadaly we talabalaýyk ideg işleri dowam etdirilýär.

Hasaplaşyklar we sosial desgalaryň gurluşygy

Oba hojalyk pudagynda zähmet çekýänleriň bähbitlerini goramak we hyzmatdaşlygy pugtalandyrmak ugrunda hem yzygiderli ädimler ädilýär. 2026-njy ýylyň hasyly üçin bugdaý we pagta öndürijiler bilen hyzmat ediji edara-kärhanalaryň arasynda ýerine ýetirilen işler boýunça özara hasaplaşyklar dowam etdirilýär. Munuň bilen birlikde, häkim «Oba milli maksatnamasyna» laýyklykda, şu ýyl welaýatda açylyp ulanmaga berilmegi meýilleşdirilýän durmuş-ykdysady maksatly desgalardaky gurluşyk işleriniň ýagdaýy barada hem belläp geçdi.