Lebapda saglygy goraýyş işgärleri höweslendirildi

Welaýat köpugurly hassahanasynda welaýat saglygy goraýyş müdirliginiň hem-de Türkmenistanyň Saglygy goraýyş işgärleriniň kärdeşler arkalaşygynyň ilkinji guramalarynyň başlyklarynyň Türkmenabat şäher geňeşiniň bilelikde guramaklarynda Türkmenistanyň saglygy goraýyş we derman senagaty işgärleriniň güni mynasybetli baýramçylyk dabarasy geçirildi. Oňa welaýatymyzyň saglygy goraýyş ulgamynyň wekilleri, Türkmenabadyň S.A.Nyýazow adyndaky «Buýan» obasenagat toplumynyň işgärleri hem-de Türkmenabadyň lukmançylyk orta okuw mekdebiniň mugallymlarydyr talyplary gatnaşdylar.

Dabarada «Saglyk» Döwlet maksatnamasyndan gelip çykýan wezipeleri durmuşa geçirmekde, ilata ýokary hilli lukmançylyk hyzmatlaryny bermekde has tapawutlanan saglygy goraýyş işgärlerine baýramçylyk sowgatlary gowşuryldy. Şeýle-de dabarada tejribeli lukmanlaryň çykyşlary diňlenildi. Çykyşlarda «Saglyk» Döwlet maksatnamasynyň kabul edilmeginiň 30 ýyllygy bellenilýän üstümizdäki ýylymyzda ähli etrapdyr şäherlerimizde saglygy goraýyş ulgamyny kämilleşdirmek, keselleriň öňüni almagyň we olary bejermegiň täze usullaryny ornaşdyrmak boýunça netijeli işleriň amala aşyrylandygy we bu ugurda şanly üstünliklere ýetilendigi bellenildi.