Türkmenistan Deňze çykalgasy bolmadyk ösüp barýan ýurtlar üçin BMG-niň üçünji halkara maslahatyna taýýarlanýar

2025-nji ýylyň 11-nji aprelinde, BMG-niň Baş Assambleýasynyň 79-njy mejlisinde bu maslahaty geçirmegi tassyklaýan kararnama biragyzdan kabul edildi. Bu karar Türkmenistanyň başlangyçlaryna halkara goldawyň dowam edýändigini görkezdi.

Türkmenistanyň Prezidentiniň tabşyrygy boýunça iş toparlary düzülýär, okuw maksatnamalary taýýarlanylýar we daşary ýurt dillerini bilýän talyplardan meýletinçi topary döredilýär. Bu işe ýokary okuw jaýlarynyň mugallymlary, terjimeçiler we degişli okuw merkezleriniň, şol sanda Söwda we daşary ykdysady aragatnaşyklar ministrliginiň Söwda-kooperatiw kollejiniň talyplary çekilýär.

Esasy maslahatdan başga-da, Halkara ýaşlar forumy, ýaş jurnalistler we blogerçiler bilen bilelikdäki habarlandyryş-bilim çäreleri geçiriler. Mart aýyndan bäri meýletinçiler üçin dil we protokol taýýarlygy boýunça ýörite okuwlar, hünärmenleriň gatnaşmagynda türgenleşikler geçirilýär.

Bu çäre deňze çykalgasy bolmadyk ýurtlaryň durnukly ösüş meselelerini ara alyp maslahatlaşmak, halkara hyzmatdaşlygy berkitmek we hyzmatdaşlygyň täze ugurlaryny gözlemek üçin niýetlenendir.