Türkmenistan Kuweýtde geçirilýän Aziýanyň Körler birleşiginiň forumyna gatnaşýar

Kuweýtde 3–5-nji fewral aralygynda Aziýanyň Körler birleşiginiň (ABU) Ýerine ýetiriji komitetiniň mejlisi geçirilýär. Bu çärä guramanyň Ýerine ýetiriji komitetiniň agzasy bolan Merdan Reýimowyň ýolbaşçylygyndaky Türkmenistanyň Körler we kerler jemgyýetiniň wekiliýeti gatnaşýar.

Forumda Türkmenistanyň, Özbegistanyň, Gyrgyzystanyň, Kuweýtiň, Kataryň, Şri-Lankanyň, Pakistanyň, Iordaniýanyň hem-de Aziýa sebitiniň beýleki ýurtlarynyň degişli guramalarynyň wekilleri çykyş edýärler. Duşuşygyň esasy maksady ýerine ýetirilen işleriň seljerilmegi we guramanyň ösüş ugurlarynyň kesgitlenmegidir.

Mejlisleriň dowamynda 2026-njy ýyl üçin çäreleriň strategik meýilnamalaşdyrylmagy hem-de Aziýanyň Körler birleşiginiň ösüş konsepsiýasy ara alnyp maslahatlaşylýar. Forumyň çäklerinde guramanyň Konstitusiýasyna üýtgetmeler girizmek boýunça iş topary döredildi.

Maksatnama jemgyýetçilik ulgamynda marketingiň ösdürilmegi, görüş mümkinçilikleri çäkli bolan adamlaryň arasynda telekeçiligi goldamak we assistiw, ýagny kömekçi tehnologiýalary ornaşdyrmak meselelerine bagyşlanan tematik mejlisleri öz içine alýar. Aýratyn bir mejlis görüş mümkinçilikleri çäkli zenanlaryň jemgyýetçilik durmuşyna gatnaşmagynyň meselelerine bagyşlandy.

Aziýanyň Körler birleşigi Aziýa sebitinde görüş mümkinçiligi çäkli bolan adamlaryň hukuklaryny goramak we olaryň jemgyýetçilik durmuşa giňden goşulyşmagyny üpjün etmek bilen meşgullanýar.