Türkmenistan we Türkiýe işewürlik üçin täze mümkinçilikleriň döredilmegini we işewürlik hyzmatdaşlygynyň ýokarlandyrylmagyny ara alyp maslahatlaşdylar. Degişli meselä sişenbe güni Aşgabatda Türkmenistanyň Ministrler Kabinetiniň başlygynyň orunbasary Nökerguly Atagulyýew bilen Türkiýäniň söwda ministri Ömer Bolatyň arasynda geçirilen ikitaraplaýyn duşuşygyň dowamynda garaldy. Bu barada Ömer Bolat sosial ulgamynda habar berdi.

Türkmenistan bilen Türkiýe täze iş mümkinçiliklerini döretmek we iş gatnaşyklaryny gowulandyrmak barada pikir alyşdylar.

Taraplar işewürlik gatnaşyklaryny işjeňleşdirmek, bilelikdäki sergileri, maýa goýum forumlaryny, ikitaraplaýyn işewürlik duşuşyklaryny guramak meselelerine aýratyn üns berdiler. Bu çäreler telekeçilik işjeňligini höweslendirmäge hem-de maýa goýumlary çekmäge gönükdirilendir.

Şeýle hem gepleşikleriň dowamynda söwda, potratçylyk işi, bilelikdäki maýa goýumlar, energetika, ulag we syýahatçylyk ýaly ykdysadyýetiň ähli pudaklarynda hyzmatdaşlygy ösdürmäge taýýarlyk tassyklanyldy.

Habarda bellenilişi ýaly, 2025-nji ýylyň jemlerine görä, ikitaraplaýyn söwdanyň möçberi 2,2 milliard ABŞ dollaryna barabar boldy. Taraplar haryt dolanyşygyny 5 milliard ABŞ dollaryna çenli artdyrmak maksady bilen alnyp barylýan işleri dowam etdirjekdiklerini beýan etdiler.

Duşuşyk 10–12-nji fewral aralygynda Aşgabatda geçirilýän Türkiýe Respublikasynyň eksport harytlarynyň sergisiniň çäklerinde geçirildi.