Aşgabatda geçirilen Garaşsyz Döwletleriň Arkalaşygyna (GDA) agza döwletleriň Hökümet Baştutanlarynyň Geňeşiniň mejlisinde söwda-ykdysady ugurlardaky hyzmatdaşlygy has-da giňeltmäge aýratyn ähmiýet berildi.

Mejlisde Türkmenistanyň Hökümetine wekilçilik edip çykyş eden Ministrler Kabinetiniň Başlygynyň orunbasary Hojamyrat Geldimyradow ýurdumyzyň GDA döwletleri bilen söwda-ykdysady gatnaşyklarynyň okgunly ösüşe eýe bolup durýandygyny aýratyn belledi.

Maliýe-ykdysady görkezijiler barada durup geçilende, Türkmenistanyň GDA ýurtlary bilen umumy haryt dolanyşygynyň 4 milliard ABŞ dollaryndan geçendigi mälim edildi. Şol bir wagtda, 2026-njy ýylyň ilkinji aýlarynyň netijelerine görä özara söwdanyň möçberi, geçen ýylyň degişli döwri bilen deňeşdirilende 30 göterimden gowrak ösüş görkezip, 1 milliard ABŞ dollaryndan hem geçdi.

Mejlisde edilen çykyşyň dowamynda GDA-nyň hyzmatdaşlygy berkitmek we özara bähbitli ykdysady gatnaşyklary ösdürmek üçin örän möhüm sebit meýdançasy bolup galýandygy bellenildi. Häzirki şertlerde, ählumumy wezipeleriň we tehnologik üýtgeşmeleriň giňişliginde, Arkalaşygyň ýurtlarynyň söwda-ykdysady hyzmatdaşlygy giňeltmek boýunça bilelikdäki anyk ädimleri işjeňleşdirmeginiň zerurdygy nygtaldy.

Şeýle hem, Türkmenistanyň GDA-da başlyklyk etmegi astynda geçýän çäreleriň ähmiýetine aýratyn üns çekildi. Soňky ýyllarda Arkalaşygyň çäklerinde ykdysady we sanly ulgamlarda özara gatnaşyklarda örän uly we baý tejribäniň toplanylandygy bellenilip geçildi.