Türkmenistanyň wekiliýeti Astanada geçiriljek sebitleýin ekologiýa sammitine gatnaşar
21-22-nji aprelde Gazagystanyň paýtagty Astana şäheri Merkezi Aziýa üçin strategik ähmiýetli duşuşyklaryň merkezine öwrüler. Bu ýerde sebit döwletleriniň Baştutanlarynyň gatnaşmagynda Sebit ekologiýa sammiti hem-de Araly halas etmegiň halkara gaznasyny (AHHG) esaslandyryjy döwletleriň Baştutanlarynyň Geňeşiniň mejlisi geçiriler.
Sammitiň dowamynda Merkezi Aziýanyň durnukly ösüşini üpjün etmek maksady bilen, aşakdaky ugurlar boýunça giňişleýin pikir alyşmalar bolar:
- Sebitleýin hyzmatdaşlyk: Ekologiýa howpsuzlygyny üpjün etmekde bäş döwletiň tagallalaryny birleşdirmek.
- Howanyň üýtgemegi: Global maýlamanyň sebitiň ekoulgamyna ýetirýän täsirlerini azaltmak.
- Suw serişdelerini dolandyrmak: Sebitdäki suw meselelerini özara bähbitli we ylmy esasda çözmek.
Möhüm gepleşikleriň jemleri boýunça Merkezi Aziýanyň döwlet Baştutanlarynyň sebit ekologiýa hyzmatdaşlygy boýunça Bilelikdäki Jarnamasynyň kabul edilmegine garaşylýar. Bu resminama geljekde amala aşyryljak ekologiýa taslamalarynyň hukuk binýadyny berkider.
AHHG-ny esaslandyryjy döwletleriň Baştutanlarynyň Geňeşiniň mejlisiniň çäklerinde hem Aral deňziniň sebitindäki ýagdaýy gowulandyrmaga gönükdirilen birnäçe möhüm resminamalara gol çekilmegi meýilleşdirilýär.
Türkmenistan bu ugurda halkara başlangyçlaryň we sebit diplomatiýasynyň işjeň tarapdary hökmünde çykyş edip, ekologiýa meseleleriniň çözgüdine uly goşant goşmagyny dowam etdirýär.
