Türkmenistanyň Prezidenti türkmen halkyny Garaşsyzlyk güni bilen gutlady

Türkmenistanyň Prezidenti halkymyzy mukaddes Garaşsyzlygymyzyň 34 ýyllyk şanly toýy bilen gutlady. Arkadagly Gahryman Serdarymyzyň Gutlagynda şeýle sözler beýan edilýär:

Eziz watandaşlar!

Hormatly adamlar!

Sizi Türkmenistanyň milli baýramy — Garaşsyzlyk güni bilen tüýs ýürekden gutlaýaryn. Bu mukaddes baýramçylygyň toý dabaralarynyň berkararlygyň, bagtyýarlygyň, ösüşiň hem-de rowaçlygyň ýoly bilen ynamly öňe barýan eziz Watanymyza milli buýsanjymyzy has-da pugtalandyryp, täze üstünlikleri gazanmaga we belent sepgitlere ýetmäge güýç-kuwwat berjekdigine berk ynanýaryn.

Garaşsyzlyk halkymyzyň beýik mertebesiniň hem-de milli buýsanjynyň Ýer ýüzüne dabaralanmagydyr. Üçünji müňýyllygyň öň ýanynda — 34 ýyl mundan ozal Garaşsyzlygymyz bütin dünýä jar edilip, demokratik, hukuk we dünýewi döwlet gurluşly nusgalyk ýol — Türkmenistanyň özygtyýarly, özbaşdak hem-de erkin ösüş ugry saýlanyp alyndy. Bu şöhratly döwürde ýurdumyz özbaşdak, garaşsyz, abadançylykly ösüş syýasatyny durmuşa geçirmek, dünýäniň syýasy, ykdysady, medeni ösüşine mynasyp goşandyny goşmak bilen, ählumumy parahatçylygyň we dostlugyň pugtalandyrylmagy üçin tagallalary birleşdirýän döwlete öwrüldi.

Berkarar döwletiň täze eýýamynyň Galkynyşy döwründe biz Garaşsyzlygymyzyň we Bitaraplygymyzyň binýadyny has-da pugtalandyryp, ýurdumyzy beýik geljege tarap ynamly öňe alyp barýarys. Şoňa görä-de, ähli ösüşlerimiziň, üstünliklerimiziň hem-de abadançylygymyzyň gözbaşy bolan Garaşsyzlyk gününe beýik baýram hökmünde aýratyn sarpa goýýarys. Özboluşly taryhy ähmiýetli bu baýramçylygymyzyň şanyna binagärlik keşbi barha gözelleşýän şäherdir obalarymyzda ýaşaýyş-durmuş, ykdysady hem-de medeni maksatly täze desgalary dabaraly açyp, Watanymyzyň berkararlygyny, halkymyzyň bagtyýarlygyny, şöhratyny hem-de mertebesini dünýä ýaýýarys.

Berkarar Watanymyzyň her bir güni täze taryhy wakalara, toý-dabaralara beslenýän Halkara parahatçylyk we ynanyşmak ýylynyň bereketli güýz paslynyň ilkinji aýynyň dowamynda gadymyýetden gözbaş alýan milli döwletlilik ýörelgelerimize eýermek bilen, paýtagtymyz Aşgabat şäherinde Halkara senagatçylar we telekeçiler uniwersitetiniň täze binalar toplumyny, çüýşe önümlerini öndürýän döwrebap önümhanany, döwrebaplaşdyrylan «Türkmenistanyň Garaşsyzlygynyň XV ýyllygy» seýilgähini, Ahal welaýatynda Döwletli mekan hem-de Bagtly zamana obalaryny, Daşoguz welaýatynda Bitaraplyk şäherçesini, Mary welaýatynda Türkmenistanyň Döwlet energetika institutynyň täze goşmaça okuw binasyny, umumy ýaşaýyş jaýyny, sport desgasyny we aýlawly ýoluň ugrundaky «Täze kuwwat» binasyny hem-de beýleki onlarça binalary toý sowgady hökmünde dabaraly açyp, mukaddes Garaşsyzlygymyzyň hem-de döwrümiziň belentligini, agzybirligimiziň hem-de jebisligimiziň mizemezligini bütin dünýä äşgär etdik.

Eziz watandaşlar!

Milli ykdysadyýetimizi döwrebaplaşdyrmagy, raýatlarymyzyň durmuşynyň derejesini we hilini ýokarlandyrmagy, täze obalary, şäherdir etraplary gurmagy göz öňünde tutýan maksatnamalarymyzy üstünlikli durmuşa geçirýäris. Döwletimiziň dünýä bileleşigindäki ornuny berkitmek hem-de halkara abraýyny ýokarlandyrmak boýunça ägirt uly işleri amala aşyrýarys. Garaşsyzlyk gününiň öň ýanynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Gurbanguly Berdimuhamedowyň başlyklyk etmeginde halk häkimiýetiniň ýokary wekilçilikli edarasynyň nobatdaky taryhy mejlisi guramaçylykly geçirilip, döwletimiziň we jemgyýetimiziň mundan beýläk-de gülläp ösmegi bilen bagly möhüm çözgütleri kabul etdik. Biziň gazanýan guwandyryjy üstünliklerimiz, belent sepgitlerimiz, şanly ýeňişlerimiz beýik ösüşlerimiziň geljekki has uly rowaçlyklarynyň binýadydyr.

Hormatly watandaşlar!

Garaşsyzlyk ýyllarynda ýurdumyzyň müňýyllyklardan gözbaş alýan parahatçylyk we dostluk ýörelgelerine, ynsanperwerlige hem-de ynanyşmaga esaslanýan Bitaraplyk syýasaty dünýä bileleşigi tarapyndan hemmetaraplaýyn goldanyldy hem-de täze syýasy tejribe hökmünde ykrar edildi. Halkara parahatçylyk we ynanyşmak ýylynda Birleşen Milletler Guramasynyň Baş Assambleýasy tarapyndan ýurdumyzyň hemişelik Bitaraplygynyň üçünji gezek ykrar edilmegi biziň parahatçylyk söýüjilik, ynsanperwerlik, hoşniýetlilik ýörelgelerimize dünýä bileleşigi tarapyndan berlen iň uly bahadyr we ýokary ynamdyr.

Bitaraplyk biziň depginli ösüşlerimiziň kepilidir, merdana pederlerimiziň parahatçylyk we durnuklylyk, dostluk hem-de hoşniýetli goňşuçylyk baradaky asyrlarboýy eden arzuwlarynyň has-da üstünlikli durmuşa geçirilmegi üçin täze mümkinçiliklerdir. Garaşsyz ýurdumyzyň hemişelik Bitaraplyk hukuk derejesi Birleşen Milletler Guramasy, Ýewropa Bileleşigi, Garaşsyz Döwletleriň Arkalaşygy, Şanhaý Hyzmatdaşlyk Guramasy, Ýewropada Howpsuzlyk we Hyzmatdaşlyk Guramasy, Goşulyşmazlyk Hereketi, Yslam Hyzmatdaşlyk Guramasy ýaly abraýly halkara guramalar, Ýer ýüzüniň döwletleri bilen syýasy, ykdysady, medeni gatnaşyklary yzygiderli giňeltmegiň, aýratyn-da, parahatçylygyň we ylalaşygyň, ählumumy ösüşiň hatyrasyna tagallalary birleşdirmegiň mäkäm halkara hukuk esasydyr. «Awaza» milli syýahatçylyk zolagynda ýokary derejede geçirilen Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahaty hem Türkmenistanyň ýöredýän parahatçylyk, hoşniýetlilik we Bitaraplyk syýasatynyň ajaýyp miwesidir.

Eziz watandaşlar!

Hormatly adamlar!

Sizi Garaşsyzlyk güni bilen ýene-de bir gezek tüýs ýürekden gutlaýaryn. Size berk jan saglygyny, uzak ömür, egsilmez bagt we maşgala abadançylygyny, eziz Watanymyzyň mundan beýläk-de gülläp ösmegi ugrunda alyp barýan işleriňizde uly üstünlikleri arzuw edýärin.