Waşingtonda möhüm duşuşyk: Türkmenistan we ABŞ hyzmatdaşlygyň täze ugurlaryny kesgitlediler
Amerikanyň Birleşen Ştatlarynyň paýtagty Waşington şäherinde Türkmenistanyň we ABŞ-nyň daşary syýasat edaralarynyň ýolbaşçylarynyň gatnaşmagynda ýokary derejeli duşuşyk geçirildi. Bu barada Türkmenistanyň DIM-niň web-saýtynda habar berilýär. Ak tamda guralan bu gepleşikleriň dowamynda Türkmenistanyň Daşary işler ministri Raşid Meredow hem-de ABŞ-nyň Döwlet sekretary Marko Rubio ikitaraplaýyn gatnaşyklaryň strategik ugurlaryny ara alyp maslahatlaşdylar.
Duşuşykda taraplar soňky döwürde türkmen-amerikan syýasy-diplomatik dialogynyň täze basgançaga göterilendigini we barha işjeňleşýändigini aýratyn kanagatlanma bilen bellediler. Şeýle hem dowamly ösüşi üpjün etmekde ýokary we iň ýokary derejedäki yzygiderli duşuşyklaryň hem-de geňeşmeleriň möhüm orun eýeleýändigi nygtaldy.
Gepleşikleriň esasy özeni ykdysady hyzmatdaşlyga gönükdirildi. Taraplar söwda-ykdysady, energetika we ulag-aragatnaşyk ulgamlaryndaky gatnaşyklary giňeltmäge aýratyn üns berdiler. Şunda energetika howpsuzlygyny üpjün etmek we sebitde energiýa serişdeleriniň iberiliş ugurlaryny diwersifikasiýalaşdyrmak (dürli ugurlara gönükdirmek) meseleleri özara bähbitli hyzmatdaşlygyň ileri tutulýan ugurlarynyň biri hökmünde kesgitlendi.
Duşuşygyň dowamynda sebit howpsuzlygy, häzirki zaman howplaryna we wehimlerine garşy göreşmek, şeýle hem köptaraplaýyn formatlarda, şol sanda «C5+1» platformasynyň çäklerinde hyzmatdaşlyk meselelerine-de garaldy.
Gepleşikleriň jeminde taraplar ikitaraplaýyn gatnaşyklaryň geljeginiň örän uludygyny tassyklap, özara gyzyklanma bildirilýän ähli ugurlar boýunça netijeli we konstruktiw dialogy yzygiderli dowam etdirmäge taýýardyklaryny mälim etdiler.
