Ynsan ömrüniň gymmaty onuň halal zähmeti, adamlara eden ýagşylygy we geljekki nesillere galdyran göreldesi bilen kesgitlenýär. Ömrüniň köp bölegini saglygy goraýyş ulgamyna bagyşlap, ilatyň saglygyny goramak ugrunda zähmet çeken ildeşlerimiziň biri-de Ahmet Mergenowdyr. Onuň köpýyllyk zähmet ýoly lukmançylyk hünärine wepalylygyň, ýokary jogapkärçiligiň hem-de ynsanperwerligiň aýdyň nusgasydyr.

Ahmet Mergenow 1946-njy ýylyň 20-nji dekabrynda Darganata etrabynyň Sediwer geňeşliginiň Şyharyk obasynda daýhan maşgalasynda dünýä inýär. Ol etrabyň Magtymguly Pyragy adyndaky 1-nji orta mekdebini üstünlikli tamamlaýar. Ynsan saglygyny goramak ýaly asylly käri saýlap alan Ahmet Mergenow 1965–1971-nji ýyllarda Azerbaýjan döwlet lukmançylyk institutynyň sanitariýa-gigiýena fakultetinde bilim alýar.

Ýokary okuw mekdebini tamamlandan soň, zähmet ýoluna Darganata etrabyndaky Arassaçylyk we keselleriň ýaýramagyna garşy göreşmek gullugynyň barlaghanasynda başlaýar. Ol köpýyllyk zähmet tejribesiniň dowamynda sanitariýa-epidemiologiýa ulgamynda dürli jogapkärli wezipelerde işleýär. Bakteriologiýa barlaghanasynyň müdiri, baş lukman, arassaçylyk we keselleriň ýaýramagyna garşy göreşmek gulluklarynyň ýolbaşçysy hem-de epidemiolog lukmany bolup, öz hünärine yhlasly çemeleşýändigini görkezýär.

Ahmet Mergenow zähmet çekýän ýyllarynda ilatyň saglygyny goramak, keselleriň öňüni almak we sagdyn durmuş ýörelgelerini wagyz etmek işlerine mynasyp goşant goşýar. Ol öz baý tejribesini ýaş hünärmenler bilen paýlaşyp, olaryň hünär taýdan kämilleşmegine ýardam berýär. Lukmançylyk işine bolan söýgüsi, guramaçylyk başarnyklary we adamlara bolan mähirli garaýşy bilen kärdeşleriniň hem-de ildeşleriniň arasynda uly hormat-sylaga eýe bolýar.

Halypa lukmanyň ömür ýoly ýaş nesiller üçin görelde mekdebidir. Ynsan saglygyny goramak ýaly jogapkärli we asylly işe bagyşlanan ömür jemgyýet üçin gymmatly miras bolup galýar. Ahmet Mergenowyň zähmet ýoly hem hünäre wepalylygyň, yhlasyň we ynsanperwerligiň ähmiýetini açyp görkezýär.

Çeşme: Lebap.biz