BMT Giyohvandlik va jinoyatchilik bo‘yicha boshqarmasi: Markaziy Osiyoda muhim xomashyo loyihasi ishga tushirilmoqda

Yevropa Ittifoqining moliyaviy ko‘magida BMTning Yevropa iqtisodiy komissiyasi bilan hamkorlikda BMT Giyohvandlik va jinoyatchilik bo‘yicha boshqarmasining mintaqaviy vakolatxonasi “Xavfsiz muhim xomashyo (CRMs): Markaziy Osiyoda CRMs ta’minot zanjirlarini mustahkamlash” nomli uch yillik loyiha ishga tushirilganini e’lon qildi.

BMT Giyohvandlik va jinoyatchilik bo‘yicha boshqarmasi ma’lumotlariga ko‘ra, loyiha litiy, kobalt, marganes, mis, nodir yer elementlari va boshqa muhim minerallarni qazib olish salohiyatiga ega bo‘lgan besh mamlakatni — Turkmaniston, Qozog‘iston, Qirg‘iziston, Tojikiston va O‘zbekistonni qamrab oladi.

Loyiha resurslarni barqaror boshqarish bo‘yicha xalqaro standartlarni joriy etishga, davlat muassasalari va mutaxassislar salohiyatini oshirishga, shuningdek, mintaqaviy hamkorlik va bilim almashinuvini mustahkamlashga qaratilgan.

Xalqaro energetika agentligi ma’lumotlariga ko‘ra, muhim xomashyoga bo‘lgan global talab 2040 yilga kelib to‘rt baravar oshishi mumkin. Bu esa mintaqani, jumladan Yevropa Ittifoqini ham o‘z ichiga olgan holda, barqaror ta’minot zanjirlarini shakllantirishda strategik ahamiyatga ega qiladi.

Loyihaning amalga oshirilishi mintaqada iqtisodiy barqarorlikni mustahkamlashga hamda global “yashil” ta’minot zanjirlarining rivojlanishiga xizmat qilishi kutilmoqda.