Jahon sog‘liqni saqlash tashkiloti (JSST) iqlim o‘zgarishining inson salomatligiga salbiy ta’sirini kamaytirish maqsadida hukumatlar tomonidan amalga oshirilishi lozim bo‘lgan oltita muhim chora-tadbirni e’lon qildi.

Tashkilot tomonidan yaqinda chop etilgan maxsus hisobotda ta’kidlanishicha, ushbu tashabbuslarni amalga oshirish har yili 1,6 million inson hayotini saqlab qolish va katta iqtisodiy foyda olish imkonini beradi. Hozirgi vaqtda dunyo bo‘ylab taxminan 3,6 milliard kishi iqlim o‘zgarishi hamda u bilan bog‘liq sog‘liq uchun xavf-xatarlarga ko‘proq duchor bo‘ladigan hududlarda yashaydi.

JSST tomonidan taklif etilayotgan chora-tadbirlar aholi salomatligini muhofaza qilish va iqlim o‘zgarishi bilan bog‘liq xavflarning oldini olishga qaratilgan. Ular quyidagilardan iborat:

  1. Yuqori havo harorati haqida aholini oldindan xabardor qilish va sog‘liqni saqlash tizimining imkoniyatlarini takomillashtirish.

  2. Qurg‘oqchilik yoki tabiiy ofatlar yuz berganida ham aholini toza ichimlik suvi bilan uzluksiz ta’minlay oladigan tizimlarni yaratish.

  3. Aholi yashash joylarida sanitariya sharoitlarini yaxshilash.

  4. Aholini zarur gigiyena vositalari bilan ta’minlash va qo‘l yuvish uchun qulay sharoitlar yaratish.

  5. Uy xo‘jaliklarida ovqat tayyorlash va turar joylarni isitish uchun yanada toza yoqilg‘i turlari hamda zamonaviy texnologiyalardan foydalanish.

  6. Qazib olinadigan yoqilg‘i resurslariga nisbatan yanada samarali narx siyosatini yuritish.

Mutaxassislarning ta’kidlashicha, ushbu chora-tadbirlarni amalga oshirish iqlim o‘zgarishi bilan bog‘liq sog‘liq muammolarini kamaytirishda muhim ahamiyat kasb etishi mumkin.