UEFAning 2026/27-yilgi mavsumidagi Millatlar ligasi guruh bosqichining beshinchi tur uchrashuvlarida Qozog‘iston va Gruziya milliy terma jamoalari raqiblariga imkoniyatni boy berdilar.

C ligasining 3-guruhi doirasida Kishinyov shahrida bo‘lib o‘tgan uchrashuvda Qozog‘iston terma jamoasi Moldovaga 1:2 hisobida mag‘lub bo‘ldi. Uchrashuvning 39- va 77-daqiqalarida Petru Popesku gol urdi. Qozog‘iston jamoasining yagona golini 51-daqiqada Islam Chesnokov kiritdi.

Besh turdan so‘ng 2 ochko jamg‘argan Qozog‘iston guruhda oxirgi, to‘rtinchi o‘rinda bormoqda. Slovakiya 11 ochko bilan birinchi, Moldova 7 ochko bilan ikkinchi, Farer orollari terma jamoasi esa 5 ochko bilan uchinchi o‘rinni egallab turibdi. Shu tariqa, Qozog‘iston terma jamoasi yuqoriroq divizionga ko‘tarilish imkoniyatini yo‘qotdi.

16-noyabr kuni bo‘lib o‘tadigan yakuniy turda Moldova Farer orollari terma jamoasi bilan safarda uchrashadi, Qozog‘iston esa Slovakiyani o‘z maydonida qabul qiladi.

Gruziya terma jamoasi ham mag‘lubiyatga uchradi

B ligasining 2-guruhida Gruziya milliy terma jamoasi Tbilisida Vengriyaga 0:2 hisobida imkoniyatni boy berdi. Uchrashuvning 73-daqiqasida gruziyalik himoyachi Lasha Dvali o‘z darvozasiga gol kiritib qo‘ydi. 85-daqiqada Barnabash Varga Vengriya jamoasining ikkinchi golini urdi.

Ushbu mag‘lubiyatdan so‘ng 2 ochkoga ega Gruziya terma jamoasining guruhda ikkinchi o‘rinni egallash va A ligasiga ko‘tarilish imkoniyati qolmadi.

Guruhning boshqa uchrashuvida Shimoliy Irlandiya terma jamoasi Ukrainani 1:0 hisobida mag‘lub etdi. Ayni paytda Shimoliy Irlandiya 11 ochko bilan birinchi o‘rinda bormoqda. Vengriya 10 ochko bilan ikkinchi, Ukraina esa 4 ochko bilan uchinchi o‘rinni egallagan.

17-noyabr kuni bo‘lib o‘tadigan yakuniy turda Gruziya Slovakiyaning Kositse shahrida Ukraina bilan uchrashadi. Vengriya esa o‘z maydonida Shimoliy Irlandiya terma jamoasini qabul qiladi.