“Real Madrid” La Ligada ketma-ket oltinchi g‘alabasini qo‘lga kiritdi

Ispaniyaning La Liga chempionatida ishtirok etayotgan Madridning “Real” jamoasi g‘alabali yurishini davom ettirmoqda. “Qirollik klubi” bu safar ham raqibiga hech qanday imkon qoldirmay, kuchli o‘yin ko‘rsatdi.

Musobaqaning 6-turida “Real Madrid” safarda “Levante”ni 4:1 hisobida mag‘lub etdi. Uchrashuvning birinchi bo‘limida jamoaning braziliyalik hujumchisi Vinisius 28-daqiqada, yangi transfer Franko Mastantuono esa 38-daqiqada gol urdi.

Tanaffusdan so‘ng esa “Real”ning fransiyalik yulduzi Kilian Mbappe atigi ikki daqiqa ichida ikkita gol kiritdi. Uning 64- va 66-daqiqalarda kiritgan gollari o‘yinning taqdirini hal qildi.

Ushbu mavsumda Mbappening hisobida allaqachon 7 ta gol va 1 ta golli uzatma mavjud. Hozirda u La Liganing eng samarali futbolchisi bo‘lib turibdi.

Shu tariqa, Xabi Alonsoning shogirdlari 6 ta o‘yinning barchasida g‘alaba qozonib, 18 ochko bilan turnir jadvalida yetakchilikni saqlab qolmoqda. Jamoaning navbatdagi — 7-tur o‘yini 27-sentabr kuni bo‘lib o‘tadi. Bu o‘yin “Atletiko Madrid” bilan derbi bo‘lib, muxlislar orasida katta qiziqish uyg‘otmoqda.

“Barselona” esa 5 ta o‘yinda 4 ta g‘alaba qozonib, 1 ta durang o‘ynagan. Kataloniya klubining yana 1 ta zaxira (o‘tkazilmagan) o‘yini mavjud.