Sog‘lom ovqatlanish siri: Mevaning sharbatini emas, o‘zini iste’mol qiling!
Zamonaviy tibbiyot va parhezshunoslik fani meva iste’mol qilishning eng sog‘lom usullari haqida yangi ma’lumotlarni ochib bermoqda. So‘nggi ilmiy tadqiqotlar mevaning shunchaki sharbatini ichishdan ko‘ra, uning o‘zini yeyish yoki blenderdan o‘tkazib (smuzi) iste’mol qilish ancha foydali ekanini isbotladi.
«Frontiers in Nutrition» jurnalida chop etilgan maqolada ta’kidlanishicha, tayyor meva sharbatlarini haddan tashqari ko‘p iste’mol qilish sog‘liq uchun ba’zi xavflarni keltirib chiqarishi mumkin. Olimlarning aniqlashicha, meva sharbatini ko‘p ichadigan odamlarda qandli diabet va xolesterin miqdori oshishi kabi holatlar ko‘proq uchraydi.
Buning asosiy sababi shundaki, sharbat siqib olinganda mevaning eng qimmatli qismi bo‘lgan kletchatka (o‘simlik tolalari) va ko‘plab vitaminlar yo‘qoladi. Shu bilan birga, meva blenderda smuzi shaklida tayyorlanganda, barcha foydali moddalar va vitaminlar to‘liq saqlanib qoladi. Bunday maydalangan meva badanga oson so‘riladi va to‘yimlilik darajasi yuqori bo‘ladi.
Mutaxassislar meva kam yeydigan yoki faqat sharbat bilan cheklanadigan odamlarda nafaqat jismoniy, balki psixologik muammolar ham yuzaga kelishi mumkinligidan ogohlantiradilar:
- Uyqusizlik;
- Ruhiy tushkunlik va stress;
- Semizlik.
Butunjahon Sog‘liqni Saqlash Tashkiloti (BSST) mutaxassislari sog‘lom hayot uchun quyidagi qoidalarga amal qilishni maslahat beradilar:
- Kunlik miqdor: Har kuni kamida 400 gramm sabzavot va meva yeyish zarur.
- Sharbat cheklovi: Kun davomida ichiladigan meva sharbati miqdori 150 ml dan oshmasligi kerak.
- Aralashtirish: Ikki yoki uch xil meva aralashtirib yeyish badanni turli vitaminlar bilan boyitishga yordam beradi.
