Bolalarni qo‘llab-quvvatlash, ularning huquqlarini himoya qilish va baxtli kelajagi uchun zarur shart-sharoitlarni yaratish Turkmaniston insonparvarlik siyosatining muhim yo‘nalishlaridan biridir. Bu borada yoshlarning xayriya tashabbuslarida faol ishtirok etishi alohida ahamiyat kasb etadi. Bunday tadbirlar yoshlarda ijtimoiy mas’uliyat tuyg‘usini rivojlantirish bilan birga, yordamga muhtoj bolalarni qo‘llab-quvvatlash imkonini ham yaratadi.
Ana shunday tashabbuslardan biri sifatida 20-noyabr kuni Turkmaniston Tashqi ishlar vazirligining Xalqaro munosabatlar institutida «Dunyoni o‘zgartiradigan ezgulik» nomli xayriya ko‘rgazma-yarmarkasi tashkil etildi. Unda mamlakat oliy ta’lim muassasalari, jamoat tashkilotlari, diplomatik vakolatxonalar hamda xalqaro tuzilmalar vakillari ishtirok etdi. Bu haqda «Turkmenistan» gazetasining rasmiy sayti xabar beradi.
Ko‘rgazmaning asosiy jihatlaridan biri turli yo‘nalishlarni qamrab olgan rang-barang ekspozitsiyalar bo‘ldi. Oliy ta’lim muassasalari talabalari o‘zlari tahsil olayotgan sohalar, ijodiy salohiyatlari va milliy madaniy merosga bo‘lgan qiziqishlarini namoyon etuvchi stendlarni tayyorladilar. Mehmonlar tasviriy va amaliy bezak san’ati namunalari, qo‘l mehnati bilan yaratilgan buyumlar, milliy taqinchoqlar hamda esdalik sovg‘alari bilan tanishdilar. Shuningdek, turli taomlar va shirinliklardan tatib ko‘rish imkoniga ega bo‘ldilar.
Tadbir davomida talabalarning faol chiqishlari alohida taassurot qoldirdi. Ular nafaqat tayyorlagan mahsulotlarini namoyish etdilar, balki mehmonlarga ularning o‘ziga xos jihatlari, milliy urf-odatlar va ijodiy g‘oyalari haqida ham so‘zlab berdilar. Shu tariqa ko‘rgazma tajriba almashish, fikr-mulohazalar bildirish va mamlakat madaniy hayotining rang-barangligi bilan tanishish uchun o‘ziga xos maydonga aylandi.
Xayriya ko‘rgazma-yarmarkasida Turkmaniston Davlat badiiy akademiyasi, Turkman davlat madaniyat instituti, S.A. Niyozov nomidagi Turkman qishloq xo‘jaligi universiteti, Turkman davlat iqtisodiyot va boshqaruv instituti, Maxtumquli nomidagi Turkman davlat universiteti, Turkman davlat moliya instituti, Xalqaro gumanitar fanlar va rivojlanish universiteti hamda Davlatmamat Ozodiy nomidagi Turkman milliy jahon tillari instituti professor-o‘qituvchilari va talabalari qatnashdilar.
Tadbirning ahamiyati madaniy ko‘rgazmalarni namoyish etish bilangina cheklanmay, uning xayriya maqsadi bilan ham chambarchas bog‘liq bo‘ldi. Yarmarkadan tushgan barcha mablag‘lar Turkmaniston Prezidenti huzuridagi Gurbanguli Berdimuhamedov nomidagi Vasiylikka muhtoj bolalarga yordam berish xayriya jamg‘armasiga o‘tkazildi. Ushbu mablag‘lar alohida e’tibor va ko‘makka muhtoj bolalarni qo‘llab-quvvatlashga yo‘naltirildi.
Tadbirning aynan 20-noyabr kuni o‘tkazilgani ham alohida mazmun kasb etadi. Chunki bu sana Butunjahon bolalar kuni sifatida nishonlanadi. Bolalar huquqlarini himoya qilish bo‘yicha xalqaro tizimning shakllanishida ham 20-noyabr muhim o‘rin tutadi. 1959-yilda Birlashgan Millatlar Tashkiloti Bosh Assambleyasi Bola huquqlari deklaratsiyasini, 1989-yilda esa Bola huquqlari to‘g‘risidagi konvensiyani qabul qilgan. Ushbu hujjatlar bolalar huquqlarini himoya qilish, ularning farovonligi va xavfsizligini ta’minlash, shuningdek, har tomonlama uyg‘un rivojlanishi uchun imkoniyatlar yaratishning asosiy tamoyillarini belgilab berdi.
Turkmaniston ushbu yo‘nalishdagi xalqaro majburiyatlarini bajarishga izchil e’tibor qaratib kelmoqda. Tegishli xalqaro hujjatlarga qo‘shilish va nufuzli tashkilotlar bilan hamkorlik qilish bilan bir qatorda, mamlakatda bolalar salomatligini muhofaza qilish, ularni ijtimoiy qo‘llab-quvvatlash, tarbiyalash va ta’lim berishga qaratilgan milliy chora-tadbirlar ham amalga oshirilmoqda.
Shu nuqtayi nazardan, Gurbanguli Berdimuhamedov nomidagi Vasiylikka muhtoj bolalarga yordam berish xayriya jamg‘armasining faoliyati alohida ahamiyatga ega. Jamg‘armaning insonparvarlik maqsadi turkman xalqining asrlar davomida avaylab kelinayotgan mehr-shafqat, saxovat va insonparvarlik kabi milliy qadriyatlariga hamohangdir.
O‘tkazilgan ko‘rgazma-yarmarka ezgulik qilish istagi odamlarni kasbi va faoliyat yo‘nalishidan qat’i nazar birlashtirishini yana bir bor namoyon etdi. Bunday tashabbuslarda ishtirok etish talaba yoshlar uchun fuqarolik mas’uliyatini shakllantiradigan muhim tajriba maktabi bo‘lib xizmat qiladi. Jamiyat uchun esa bolalarga g‘amxo‘rlik qilish va kelajak avlodning baxtli hayotini ta’minlash umumiy vazifa ekanini yaqqol ko‘rsatadi.
Xayriya ishlarining haqiqiy qadri nafaqat moddiy yordam ko‘rsatishda, balki mehr va ko‘makka muhtoj insonlar bilan qalb iliqligini baham ko‘rishga tayyor bo‘lishda ham namoyon bo‘ladi.









Izohlar
Hozircha izoh yo'q. Birinchi bo'ling.