Turkman davlat me’morchilik-qurilish institutining yangi binolar majmuasi qurilishi yakuniy bosqichda olib borilmoqda

Poytaxtimizning Go‘ro‘g‘li ko‘chasi bo‘ylab qad rostlayotgan yangi ilm-fan va ta’lim shaharchasi — qurilishi yakuniy bosqichda bo‘lgan Turkman davlat me’morchilik-qurilish institutining zamonaviy binolar majmuasi oq marmarli Ashxobodni yanada go‘zallashtiradi. Bu haqda “Türkmenistan” gazetasida (27.02.2026-y.) xabar berildi.

Turkman davlat me’morchilik-qurilish institutining 5 ming o‘rinli yangi binolar majmuasi o‘zining kattaligi va zamonaviy texnologik ta’minoti bilan mintaqada tengi yo‘q ajoyib talabalar hamda professor-o‘qituvchilar shaharchasidir.

Yangi majmuaning me’moriy qiyofasi, o‘ziga xos poydevori va 15 qavatdan iborat asosiy binosining osmon bilan bo‘ylashgan balandligi ko‘rganlarni hayratda qoldiradi. Binoning tashqi bezagida quruvchi-me’morlar ishining asosiy quroli bo‘lgan sirkul (pargar) shaklining mahorat bilan joylashtirilishi ushbu majmua haqiqiy mutaxassislar va ijodkor quruvchilar maskani ekanligidan dalolat beradi.

Majmua tarkibiga kiruvchi 4 ta zamonaviy o‘quv binosi, 1 ming o‘rinli muhtasham majlislar zali, eng so‘nggi ilmiy nashrlar bilan ta’minlanadigan kutubxona, ko‘rgazmalar markazi va dunyo standartlariga javob beradigan sport majmuasi yaxlit uyg‘unlikni hosil qiladi. Bu yerdagi har bir devor, bezak naqshi milliy me’morchilik an’analarimiz bilan eng zamonaviy texnologiyalarning takrorlanmas uyg‘unligini ko‘rsatadi. Loyihada turkman xalqining qadimiy madaniy merosi va ijodiy ruhi innovatsion yechimlar, yuqori tezlikdagi raqamli tizimlar va “aqlli” binolarning xususiyatlari bilan birlashtirilgan.

Ushbu ulkan loyihaning eng faxrli tomoni shundaki, yangi binolar majmuasining loyihasi aynan Turkman davlat me’morchilik-qurilish institutining tajribali o‘qituvchilari hamda iqtidorli talabalari ishtirokida tayyorlanganligidir.

Yangi binolar majmuasi qurilishida innovatsion texnologiyalarga, resurs tejovchi tizimlarga, raqamlashtirishga alohida o‘rin berilmoqda. Hozirgi vaqtda qurilish-montaj ishlarining katta qismi yakunlanib, sifat ko‘rsatkichlari qat’iy nazorat qilinmoqda.

Turkman davlat me’morchilik-qurilish institutining yangi, zamonaviy binolar majmuasining tantanali ochilishi oq marmarli poytaxtimiz Ashxobodning shaharsozlik solnomasiga oltin harflar bilan yoziladi.