Turkmaniston va JSST oʻrtasidagi hamkorlikning kelajakdagi istiqbollari muhokama qilindi

Kecha Turkmaniston TIVda tashqi ishlar vaziri oʻrinbosari Mahri Bashimovaning Jahon sogʻliqni saqlash tashkiloti Yevropa mintaqaviy byurosi direktori Hans Klyuge bilan uchrashuvi boʻlib oʻtdi.

Turkmaniston TIV xabariga koʻra, uchrashuv davomida tomonlar oʻzaro hamkorlikning hozirgi holati va kelajakdagi imkoniyatlarini muhokama qildilar. MDH makonida amalga oshirilayotgan sogʻliqni saqlash diplomatiyasi boʻyicha oʻquv seminari bunday turdagi birinchi dastur boʻlib, Turkmaniston uni qabul qiluvchi mamlakat sifatida muvaffaqiyatli amalga oshirayotgani taʼkidlandi.

Tomonlar, shuningdek, 2026–2030-yillarda Markaziy Osiyoda salomatlik va farovonlikni qoʻllab-quvvatlash boʻyicha Yoʻl xaritasining loyihasini ham muhokama qildilar.

Shuningdek, Turkmaniston hududida JSSTning Tamakiga qarshi kurash boʻyicha ramkaviy konvensiyasining ijrosi, «Yagona salomatlik» konsepsiyasi doirasida jamoat salomatligi boʻyicha favqulodda vaziyatlarga tayyorgarlik masalalari hamda Kaspiy ekologik tashabbusini ilgari surish boʻyicha masalalar muhokama qilindi.

Hans Klyuge 2026-yil davomida oʻtkazilishi rejalashtirilgan yirik mintaqaviy va xalqaro forumlarda ishtirok etishga taklif qilindi.