Turkmanistonda ilmiy-tibbiy diplomatiyani rivojlantirishning 2026–2052-yillar uchun Milliy strategiyasi tayyorlanadi

Bu haqda kecha raqamli tizim orqali o‘tkazilgan Vazirlar Mahkamasining navbatdagi majlisida ta’kidlandi. «Watan» xabarlar dasturida xabar berilganidek, hozirgi vaqtda mamlakatda inson salomatligini muhofaza qilish, JSSTning xalqaro talablariga javob beradigan ilmiy-klinik markazlar, shifoxonalar, sihatgohlar, dori vositalarini ishlab chiqaruvchi korxonalar qurish, tibbiyot fanlarini rivojlantirish va xalqaro hamkorlikni mustahkamlash borasida ijobiy tajribalar muvaffaqiyatli amalga oshirilmoqda. Bu esa aholi salomatligini yanada yaxshilashga, ilg‘or tibbiyot fani va amaliyotiga asoslangan umumbashariy ilmiy-tibbiy diplomatiyani rivojlantirishga hamda bu borada mamlakatning xalqaro obro‘sini mustahkamlashga xizmat qilmoqda. Shu munosabat bilan, vitse-premer davlat rahbariga tegishli taklifni taqdim etdi.

Turkmaniston Prezidenti vitse-premer B.Mammedovning mamlakatda ilmiy-tibbiy diplomatiyani rivojlantirish bo‘yicha olib borilayotgan ishlar to‘g‘risidagi hisobotini tinglab, tibbiyot fanini rivojlantirish va bu borada xalqaro hamkorlikni mustahkamlash bo‘yicha samarali va kompleks chora-tadbirlar amalga oshirilayotganini aytdi. Davlat rahbari vitse-premerga «Turkmanistonda ilmiy-tibbiy diplomatiyani rivojlantirishning 2026–2052-yillar uchun Milliy strategiyasi»ni tayyorlash bo‘yicha tegishli ishlarni amalga oshirishni topshirdi.