«Arkadag» we «Al-Nassr» toparlarynyň duşuşygynyň geçiriljek güni stadionyň töweregindäki köçelerde ulag hereketi wagtlaýyn çäklendiriler

Ýurdumyzyň «Arkadag» futbol toparynyň Saud Arabystanynyň «Al-Nassr» futbol kluby bilen AFK-nyň Çempionlar ligasy 2 ýaryşynyň çäginde paýtagtymyzda geçirjek futbol duşuşygynyň öňüsyrasynda degişli guramaçylyk işleri alnyp barylýar. Taryhy duşuşygyň ýokary derejede geçirilmegini üpjün etmek maksady bilen, 11-nji fewralda sagat 15:00-dan soň stadionyň töweregindäki Saparmyrat Türkmenbaşy şaýolunda, 10 ýyl Abadançylyk şaýolunda, Ata Türk we Oguz han köçelerinde ulag hereketi wagtlaýyn çäklendiriler. Bu barada Aşgabat şäheriniň häkimliginiň resmi saýtynda habar berildi.

Janköýerleriň stadiona bökdençsiz we amatly gelmegini gazanmak üçin, Ankara köçesiniň ugrunda ýerleşýän awtoduralgalardan wagtlaýyn ýörite awtobus gatnawlarynyň ikisi ýola goýlar. Goşmaça awtobuslar her 2-3 minutdan gatnap, tomaşaçylaryň stadiona rahat ýagdaýda ýetmegini üpjün eder.

Şeýle-de tomaşaçylar üçin amatly şertleri döretmek maksady bilen, stadiona giriş işleri iki esasy ugur boýunça guralar. Hususan-da, Saparmyrat Türkmenbaşy şaýoly tarapdan üç sany, 10 ýyl Abadançylyk şaýoly tarapdan bolsa bir ýörite girelge arkaly janköýerleriň goýberilişi amala aşyrylar.

Olimpiýa stadionynda boljak taryhy duşuşygyň dabaraly ýagdaýda geçirilmegini üpjün etmek maksady bilen, oýnuň öňüsyrasynda ýurdumyzyň estrada ýyldyzlarynyň gatnaşmagynda aýdym-sazly konsert guralar. Konsert maksatnamasynyň sagat 17:00-da başlanjakdygyny nazara alyp, tomaşaçylaryň stadiona öňünden gelmegi, girişden bökdençsiz geçmegi we çärelerden doly lezzet almagy maslahat berilýär.

Guramaçylar bu taryhy sport baýramçylygynyň janköýerlerde ýatdan çykmajak täsirleri galdyrjakdygyna ynam bildirip, hemmeleri sport, dostluk we parahatçylyk ruhunda geçjek bu şatlykly pursatlary bilelikde garşy almaga çagyrýarlar.