Aşgabatda FAO-nyň halkara maslahaty öz işine başlady

Şu gün Aşgabatda SPEKA hepdeliginiň çäklerinde, FAO-nyň (BMG-niň Azyk we oba hojalyk guramasynyň) howandarlygynda klimatyň üýtgemegi şertlerinde azyk howpsuzlygy meselelerine bagyşlanan halkara maslahat öz işine başlady.

Forum «Üýtgeýän klimat şertlerinde saglyk we iýmitleniş» diýen umumy mowzuk astynda «Ýyldyz» otelinde geçirilýär.

Maslahatyň birinji bölümçesinde agrosenagat ulgamlaryny özgertmegiň esasy sütünleriniň biri hökmünde «Bitewi saglyk» maksatnamasy ara alnyp maslahatlaşylar. Bölümçäniň dowamynda FAO-nyň, şeýle hem Ýewropadaky Haýwanlaryň saglygyny goragyň bütindünýä guramasynyň wekilleri çykyş ederler.

Forumyň ikinji bölümçesi Merkezi Aziýada klimat durnuklylygyny berkitmek we azyk howpsuzlygyny üpjün etmek boýunça sebit başlangyçlaryna bagyşlanar. Bu bölümçede FAO-nyň, ÝUNEP-iň (BMG-niň Daşky gurşaw boýunça maksatnamasynyň), BMG-niň Ösüş maksatnamasynyň (PROON), GIZ-iň, Türkmenistanyň Daşary işler ministrliginiň wekilleriniň, şeýle hem Merkezi Aziýa ýurtlarynyň wekiliýetleriniň agzalarynyň çykyşlaryna garaşylýar.

Ýatladyp geçsek, şu gün şeýle-de SPEKA-nyň ykdysady forumynyň ikinji güni geçirilýär. Işleriň tertibi mowzuklaýyn bölümçeler görnüşindedir.

Mundan ozal, FAO-nyň Türkmenistanda öz wekilhanasyny açjakdygy barada habar beripdik.