Indoneziýaly alymlar Bangka adalarynda takmynan 100 ýyl bäri ylmy jemgyýetçiligiň ünsünden düşen seýrek haýwan — haýal hereket edýän lorisiň ýaşaýandygyny anykladylar. Täze barlaglaryň netijeleri bu görnüşiň diňe bir ýok bolup gitmändigini däl, eýsem, adanyň käbir ýerlerinde giňden ýaýrandygyny hem görkezýär.

Barlagyň awtorlarynyň bellemegine görä, lorisler dürli tebigy gurşawlarda, şol sanda oba hojalyk ekin meýdanlarynda hem duş gelýär. Bu açyş ýabany tebigatyň käbir wekilleriniň uzak ýyllaryň dowamynda alymlaryň gözegçiliginden daşarda galyp bilýändigini ýene bir gezek görkezdi.

Ylmy çeşmelerde bu haýwan barada iň soňky maglumatlaryň 1937-nji ýylda peýda bolandygy aýdylýar. Şondan bäri onuň ýagdaýy barada ygtybarly maglumatlaryň bolmazlygy biologlaryň arasynda bu görnüşiň ýok bolup gitmek howpy bilen ýüzbe-ýüz bolýandygy baradaky çaklamalaryň döremegine sebäp bolupdyr.

Şeýle-de bolsa, Bangka adasynyň ýaşaýjylary lorisleri ýyllaryň dowamynda wagtal-wagtal görüpdirler. Käbir ýagdaýlarda olar bu haýwanlary sebitdäki ýabany tebigaty goramak merkezlerine hem tabşyrypdyrlar. Ýerli ilatdan gelip gowşan maglumatlar alymlaryň bu görnüşi has içgin öwrenmegine itergi beripdir.

Täze maglumatlara esaslanyp, hünärmenler haýal hereket edýän lorisiň Gyzyl kitapdaky gorag derejesine täzeden seretmegi teklip edýärler. Olaryň pikiriçe, bu görnüşiň doly ýitip gitmek howpy astyndadygy baradaky öňki çaklamalary gaýtadan bahalandyrmak zerurdyr.

Barlagyň netijeleri «Spixiana» ylmy neşirinde çap edildi.