Her ýylyň güýz möwsüminde geçirilýän bugdaý ekişi oba hojalyk pudagynyň iň möhüm işleriniň biridir. Bu möwsümiň ýokary derejede geçirilmegi diňe bir gallaçy daýhanlaryň zähmetine däl, eýsem, ekin meýdanlarynda ulanylýan tehnikalaryň we gurallaryň sazlaşykly işlemegine hem baglydyr. Şoňa görä-de, bugdaý ekişine taýýarlyk işleri öňünden we toplumlaýyn alnyp barylýar.

Welaýat «Obahyzmat» önümçilik birleşiginiň ýerlerdäki kärhanalarynda hem güýzki bugdaý ekiş möwsümine taýýarlyk işleri giň gerimde dowam edýär. Kärhanalarda oba hojalyk tehnikalarynyň tehniki ýagdaýyna gözegçilik edilip, ekiş döwründe olaryň bökdençsiz işlemegini üpjün etmek üçin zerur çäreler görülýär.

«Garaşsyz, baky Bitarap Türkmenistan — bedew batly at-myradyň mekany» ýylynda jogapkärli möwsümi ýokary guramaçylyk derejesinde geçirmek üçin Görogly etrabynyň «Obahyzmat» önümçilik kärhanasynyň mehanizatorlary we abatlaýjy ussalary hem yhlasly zähmet çekýärler.

Kärhanada ekiş möwsüminde ulanyljak traktorlaryň, ekiş gurallarynyň we beýleki oba hojalyk tehnikalarynyň tehniki ýagdaýy barlanyp, ýüze çykarylan kemçilikler öz wagtynda aradan aýrylýar. Tehnikalaryň sazlaşykly we netijeli işlemegi üçin zerur abatlaýyş işleri geçirilýär.

Tejribeli mehanizatorlar bilen abatlaýjy ussalaryň agzybir zähmeti möwsümiň üstünlikli geçirilmegine gönükdirilendir. Sebäbi wagtynda taýýarlanan we tehniki taýdan ygtybarly tehnikalar gallaçy daýhanlaryň işini ýeňilleşdirmek bilen bir hatarda, ekiş çäreleriniň bellenen möhletlerde geçirilmegine hem ýardam edýär.

Görogly etrabynyň «Obahyzmat» önümçilik kärhanasynda alnyp barylýan taýýarlyk işleri hem güýzki bugdaý ekişiniň guramaçylykly we ýokary hilli geçirilmegine gönükdirilendir. Kärhananyň işgärleriniň jogapkärçilikli çemeleşmesi, tehnikalary taýýarlamakda görkezýän yhlasy öňde boljak ekiş möwsüminiň üstünlikli geçiriljekdigine esas döredýär.