Dünýäniň döwrebap muzeýleri

Muzeý islendik halkyň taryhy, däp-dessurlary we milliligi bilen tanyşmaga mümkinçilik berýän seýrek duş gelýän gymmatlyklaryň saklanýan ýeridir. Soňky ýyllarda ösen şäherlerde binagärligi bilen tehnologik ösüşleri sazlaşýan myhmanhanalaryň, dynç alyş merkezleriniň we howa menzilleriniň birnäçesi gurulýar. Şeýle desgalaryň hataryna döwrebap muzeýleri hem goşmak bolar. Geliň, häzirki zaman binagärligini we tehnologik ösüşleri ýaýbaňlandyrýan iň naýbaşy muzeýler bilen tanyş bolalyň!

Milwauki sungat muzeýi, ABŞ. Miçigan kölüniň kenarynda ýerleşýän bu muzeýde 25 müň sungat eseri saklanýar. ABŞ-nyň iň uly muzeýleriniň biri bolan Milwauki sungat muzeýi 3 sany aýry binadan ybarat. Binanyň iň soňky tapgyry 2001-nji ýylda (birinji tapgyry 1957ý, ikinji tapgyry 1975ý.) gurlup, polat gurluşly aýna bina «Quadracci Pavilion» diýlip atlandyrylýar. Muzeýiň döwrebap nusgasynyň taslamasy ispaniýaly binagär Santýago Kalatrawa tarapyndan işlenip taýýarlanýar. Aýna binanyň üçeginde 66 metrlik açylýan ganatlar bolup, ýokarsynda ýeliň tizligini ölçeýän sensorlar ornaşdyrylypdyr. Awtomatlaşdyrylan bu ulgam howa şertine laýyklykda ganatlaryň açylyp-ýapylmagyny üpjün edýär.

«Museo Soumaya», Meksika. Mehiko şäheriniň meşhur binalarynyň biri bolan bu muzeý owadan daşky görnüşi hem-de gijesine lowurdap şöhle saçmagy bilen ünsi özüne çekýär.

Muzeý iki binadan ybarat bolup, muzeýiň esasy bölegi Plaza Karsoda ýerleşýär. Beýikligi 46 metre ýetýän 6 gatly binada damja meňzeş 16 müň altyburçluk bar. Meşhur binagär Fernando Romeron muzeýiň taslama işinde suwdan ylham alypdyr. Binada gadymy tapyndylar bilen birlikde sungat eserleriniň 66 müňden gowragy saklanýar. Şeýle hem bu ýerde heýkellere hem-de nusgawy surat eserlerine duş gelmek bolýar.

Geljegiň muzeýi, BAE. Häzirki wagta çenli binagärlik taslamalarynyň içinde iň çylşyrymlysy hasaplanýan Geljegiň muzeýi Dubaý şäherinde ýerleşýär.

Emeli baýryň üstünde gurlan muzeýiň daşky görnüşi süýnmek halkaly ýüzüge meňzeýär. Gurluşygyna 2018-nji ýylda başlanan desga 2022-nji ýylda ulanmaga berilýär. Dubaýyň täsin galdyryjy desgalarynyň biri bolan Geljegiň muzeýi 7 gatdan ybarat bolup, sergiler, tehnologik oýlap tapyşlaryň görkezilişi ýaly köpçülikleýin çäreler geçirilýär.