“Garaşsyz ýurdyň waspy dillerde” atly dabaraly maslahat geçirildi

Ýakynda Köýtendag etrabynyň 61-nji orta mekdebiniň mejlisler zalynda Türkmenistanyň Magtymguly adyndaky Ýaşlar guramasynyň Lebap welaýatynyň Köýtendag etrap Geňeşiniň hem-de etrabyň bilim bölüminiň bilelikde guramagynda ýurdumyzyň mukaddes Garaşsyzlygynyň 34 ýyllygyna bagyşlanyp “Garaşsyz ýurdyň waspy dillerde” atly dabaraly maslahat geçirildi.

Maslahata etrabyň 61-nji orta mekdebiniň mugallymlary we okuwçylary gatnaşdylar. Dabaranyň dowamynda çykyş eden Türkmenistanyň Demokratik partiýasynyň Köýtendag etrap komitetiniň partiýa guramaçysy Seýitmurat Paýzullaýew we etrap bilim bölüminiň hünärmeni Hudaýnazar Haýutmuradow özleriniň many-mazmuna baý çykyşlarynda Garaşsyzlygymyzyň halkymyza peşgeş beren bagty, hemişelik Bitarap döwletimiziň ösüş ýolunda gazanýan üstünliklerini giňişleýin beýan etdiler.

Dabaraly maslahatyň ahyrynda oňa gatnaşanlar ýaşlaryň mynasyp bilim-terbiýe almagy, halal zähmet çekmegi ugrunda giň mümkinçilikleri döredip berýän Gahryman Arkadagymyza hem-de Arkadagly Gahryman Serdarymyza alkyş sözlerini aýtdylar.