Özbekistanyň Türkmenistandaky Ilçihanasy wiza üçin onlaýn ýazylyşyk ulgamyny işe girizýär!
Özbegistanyň Türkmenistandaky Ilçihanasy konsullyk hyzmatlaryny döwrebaplaşdyrmak ugrunda möhüm ädim ädip, wizany resmileşdirmek üçin onlaýn ýazylyş ulgamyny ornaşdyrýar.
1-nji awgustdan başlap täze elektron sanaw platformasy synag tertibinde işläp başlar. Bu barada Özbegistanyň Türkmenistandaky Adatdan daşary we Doly ygtyýarly Ilçisi Rawşanbek Alimow syýahatçylygy ösdürmäge bagyşlanan brifingde mälim etdi.
Indi ýüz tutujylar internet arkaly özlerine amatly wagty öňünden belläp, bellenen sagatda gelip bilerler. Bu bolsa janly nobatlardaky uzak garaşmalaryň öňüni alar. Şunda resminamalary tabşyrmagyň adaty tertibi hem saklanyp galýar we elektron ulgam goşmaça amatlylyk hökmünde hödürlenýär.
Ilçiniň bellän ýaly, täze ulgam aýratyn hem ýüz tutmalaryň köpelýän döwürlerinde resminama tabşyrmak işini has tertipli we amatly etmäge hyzmat eder. Ilçihana ilkinji tapgyrda synag tertibi sebäpli käbir tehniki we guramaçylykly meseleleriň ýüze çykyp biljekdigini, emma ulgam doly kämilleşdirilenden soň garaşyş wagtynyň ep-esli gysgaljakdygyny belledi.
Bu täzelik Türkmenistanyň raýatlary üçin Özbegistana syýahat etmegi has amatly we döwrebap derejä çykarar.
