Tesla-nyň ammarlarynda müňlerçe Cybertruck tozan basyp dur

Amerikanyň Birleşen Ştatlarynda Tesla-nyň ammarlarynda 10 000-den gowrak satylmadyk Cybertruck toplandy. Olaryň umumy bahasynyň 721 million ýewrodan ($809 milliondan) geçýändigi aýdylýar. ArenaEV-e görä, Tesla tarapyndan öňdebaryjy model hökmünde hödürlenen bu elektrik pikap, garaşylan satuw derejesine ýetip bilmändir.

Maglumatlara görä, soňky döwürde Cybertruck-y satyn almak mümkinçiligi giňedi. Bu ýagdaý diňe bir önümçiligiň artmagy bilen däl-de, eýsem Tesla-nyň ulagyň dürli görnüşlerini arzanladyp başlamagy bilen hem düşündirilýär. Bu bolsa, modeliň köpdürlüligini görkezýän ýaly bolup, hakykatda diňe bir awtoulag üçin dürli bahalaryň hödürlenýändigi barada sorag döredýär.

Cybertruck-yň ortaça bahasy 70 300 ýewro töweregi (takmynan $79 000). Käbir analitikler bu ýagdaýy önümçilik derejesiniň ýokarlanmagy bilen däl-de, müşderi isleginiň azalmagy bilen baglanyşdyrýarlar. Tesla eýýäm önümçilik tempini haýalladyp başlady, bu hem alyjy gyzyklanmasynyň pesdigini görkezýär.

Satylmadyk ulaglaryň bir bölegi 2024-nji ýylda öndürilen, käbiri bolsa geçen ýylyň oktýabrynda çykarylan Foundation Series atly çäkli seriýa degişlidir. Bu awtoulaglar ammarlarda birnäçe aý bäri garaşýar.

Islegi güýçlendirmek üçin kompaniýa, şol bir akkumulýator bilen üpjün edilen, yzky tigirli, has elýeterli görnüşini hem bazara çykardy.

Häzirki wagtda ammarlarda saklanýan ulaglar kompaniýanyň iki çärýeklik satuwyna barabar. Ilkinji maksat ýylda 250 000 Cybertruck öndürmekdi, emma häzirki ýagdaýda 20 000 sanysyny satmak hem kyn görünýär.

Wedbush Securities-däki analitik Den Aýwz bu ýagdaýda Tesla-nyň Cybertruck önümçiligini wagtlaýyn togtadyp biljekdigini öňe sürýär. Häzirlikçe kompaniýa resmi taýdan bu mesele boýunça habar bermedi.