Türkmenistan bilen Katar ýokary bilim ulgamyndaky hyzmatdaşlygy täze derejä çykarýarlar
2026-njy ýylyň 20-nji maýynda Doha şäherinde Türkmenistanyň Katar Döwletindäki Adatdan daşary we Doly ygtyýarly ilçisi M. Seýitmämedow Al Raýýan Halkara uniwersitet kollejiniň ýerine ýetiriji dekany doktor Iwan Ninow bilen resmi duşuşyk geçirdi. Duşuşyk iki ýurduň arasyndaky ylmy-bilim gatnaşyklaryny giňeltmegiň geljekki ugurlaryny kesgitlemäge gönükdirildi.
Duşuşygyň dowamynda diplomatik wekilhananyň ýolbaşçysy söhbetdeşini Garaşsyz, baky Bitarap Türkmenistanyň gazanýan üstünlikleri, hususan-da, ýurdumyzda 2026-njy ýylyň «Garaşsyz, baky Bitarap Türkmenistan – bedew batly at-myradyň mekany» ýyly diýlip yglan edilmegi we mukaddes Garaşsyzlygymyzyň şanly 35 ýyllygy mynasybetli guralýan halkara çäreler barada giňişleýin tanyşdyrdy. Şeýle hem Kataryň bilim wekillerine öňde boljak halkara ylmy maslahatlaryň we forumlaryň maksatnamalary barada anyk maglumatlar berildi.
Gepleşikleriň esasy böleginde taraplar Türkmenistanyň öňdebaryjy ýokary okuw mekdepleri bilen Al Raýýan Halkara uniwersitet kollejiniň arasynda göni hyzmatdaşlyk gatnaşyklaryny ýola goýmagyň amaly mehanizmlerini ara alyp maslahatlaşdylar.
Taraplaryň bellemegine görä, bu strategik hyzmatdaşlyk geljekde professor-mugallymlaryň we talyplaryň özara tejribe alyşmaklaryny guramaga, bilelikdäki ylmy-barlag taslamalaryny durmuşa geçirmäge hem-de häzirki zaman akademik gazanylanlaryny işjeň paýlaşmaga uly şert döreder.
