2026-njy ýylyň 28-nji oktýabrynda Merkezi Aziýa döwletleriniň dördünji Parlamentara forumynyň çäklerinde Türkmenistanyň Mejlisiniň Başlygy Dünýägözel Gulmanowa bilen Täjigistan Respublikasynyň Oli Majlisiniň Namoýandagon Majlisiniň Başlygy Faýzali Idizodanyň arasynda duşuşyk geçirildi.

Duşuşykda taraplar iki ýurduň döwlet Baştutanlarynyň tagallalary netijesinde ikitaraplaýyn we köptaraplaýyn görnüşde ösdürilýän döwletara hyzmatdaşlygyň häzirki ýagdaýyny we geljekki mümkinçiliklerini ara alyp maslahatlaşdylar. Şeýle hem parlament diplomatiýasynyň üsti bilen dostlukly gatnaşyklary pugtalandyrmagyň ähmiýeti bellenildi.

Dünýägözel Gulmanowa Türkmenistanyň we Täjigistanyň arasynda syýasy-diplomatik, söwda-ykdysady, medeni we ynsanperwer ugurlarda ýola goýlan hyzmatdaşlygyň yzygiderli ösdürilýändigini nygtady. Taraplaryň halkara guramalaryň çäklerinde hem birek-biregiň başlangyçlaryny goldamagy gatnaşyklaryň möhüm ugurlarynyň biri hökmünde görkezildi.

Duşuşygyň dowamynda Türkmenistanyň başlangyjy bilen Birleşen Milletler Guramasynyň Baş Assambleýasy tarapyndan kabul edilen «2028-nji ýyl — Halkara hukugyň ýyly» atly Kararnamanyň ähmiýeti aýratyn bellenildi. Bu resminamanyň halkara hukugyň ornuny ýokarlandyrmaga, ählumumy parahatçylygy we howpsuzlygy üpjün etmäge, şeýle hem netijeli köptaraplaýyn hyzmatdaşlygy ösdürmäge goşant goşjakdygy nygtaldy. Türkmenistanyň Mejlisiniň Başlygy degişli Kararnamanyň kabul edilmeginde Täjigistanyň beren goldawy üçin minnetdarlyk bildirdi.

Gepleşiklerde parlamentleriň arasynda tejribe alyşmak, kanunçykaryjylyk işinde hyzmatdaşlygy giňeltmek, parlamentara dostluk toparlarynyň we ugurdaş komitetleriň gatnaşyklaryny ösdürmek, şeýle hem wekiliýetleriň özara saparlaryny guramak meselelerine üns berildi.

Duşuşygyň ahyrynda Dünýägözel Gulmanowa Faýzali Idizodany we Täjigistanyň parlament wekillerini Aşgabatda geçiriljek halkara çärelere gatnaşmaga çagyrdy. Olaryň hatarynda «ÝHHG-niň çäginde dialogyň, ynanyşmagyň we howpsuzlygyň bähbidine halkara hukugy ilerletmek» atly üçünji Aşgabat maslahaty, Türkmenistanyň 2026-njy ýylda GDA-da başlyklyk etmeginiň çäklerinde GDA-nyň Parlamentara Assambleýasynyň Geňeşiniň mejlisi hem-de Bitaraplygyň dostlary toparyna agza ýurtlaryň parlament ýolbaşçylarynyň üçünji duşuşygy bar.