«Asus» zamonaviy oʻyinlarni kompyutersiz oʻynashga moʻljallangan monitorini taqdim etdi

«Asus» kompaniyasi oʻyin qurilmalari qatoriga mansub boʻlgan «Strix OLED XG34WCDMTG» monitorini taqdim etdi. Ushbu qurilma «Android 14» bazasidagi «Smart Google TV» qoʻllab-quvvatlovi borligi sababli, oʻziga oʻxshash deyarli barcha boshqa oʻyin monitorlaridan ajralib turadi. Shunday qilib, yangi texnologiya dunyodagi bunday xususiyatga ega birinchi oʻyin OLED-monitori boʻldi.

Soddaroq qilib aytganda, bu hech qanday shaxsiy kompyutersiz (PK) ishlay oladigan «aqlli» Android monitordir. Bundan tashqari, qurilmada «GeForce Now» xizmati qoʻllab-quvvatlovi mavjud. Demak, oʻyinlarni kompyutersiz toʻgʻridan-toʻgʻri monitorning oʻzida oʻynash mumkin.

Monitor 34 dyuym diagonalli, 1440p aniqlikdagi va 240 Gs yangilanish chastotasini qoʻllab-quvvatlaydigan oʻta keng formatli «QD-OLED» paneliga asoslangan. Yaʼni, bu allaqachon oʻtgan avlod panelidir. Shuningdek, qurilmada xususiy «Wi-Fi 6» moduli va har biri 5 Vt boʻlgan bir juft dinamik joylashtirilgan.

Ekranning egilish radiusi 1800R boʻlib, odatiy yorqinligi 250 kd/m² oʻlchamdadir, ammo HDR rejimida bu koʻrsatkich 1000 kd/m² gacha yetishi mumkin.

Monitor allaqachon 1100 dollardan sotuvga chiqarildi.