“Eni” kompaniyasining Turkmanistondagi gaz ishlab chiqarishi 22 milliard kub futga yetdi

Italiyaning “Eni” kompaniyasi tomonidan 2025-yilda Turkmanistonda qazib olingan tabiiy gaz miqdori 22 milliard kub futga (≈623 million kub metr) yetdi. 2024-yilda kompaniyaning ushbu ko‘rsatkichi 3 milliard kub futni (≈85 million kub metr) tashkil etgan edi. Bu haqda Italiyaning “Eni” neft-gaz kompaniyasining 2025-yil bo‘yicha yillik hisobotida xabar berilgan.

Yillik hisobotga ko‘ra, neft qazib olish 2 million barrelni tashkil etdi, shu bilan birga uglevodorodlarning umumiy qazib olish hajmi 3 milliondan 5 million barrelgacha (neft ekvivalentida) oshdi.

Kompaniya hisobotiga ko‘ra, gazning o‘rtacha kunlik qazib olinishi qariyb o‘n baravar ortib, har kuni 61,5 million kub futga (≈1,74 million kub metr) yetdi. Bu ko‘rsatkich 2024-yilda 6,6 million kub futga (≈0,19 million kub metr) teng bo‘lgan edi.

Shuningdek, 2025-yilda uglevodorodlarning umumiy qazib olinishi kuniga 14 ming barrel neft ekvivalentini tashkil etdi. 2024-yilda esa har kuni neft ekvivalentida 7 ming barrel uglevodorod qazib olingan.

Mamlakatda amalga oshirilayotgan ishlar doirasida asosiy e’tibor to‘qqizta zichlashtiruvchi va chetki quduqlarni burg‘ulashga qaratildi. Bundan tashqari, suvni qatlamga haydash uchun beshta quduq qayta jihozlandi. Bu esa konlarda bosimni saqlashga va uglevodorodlarni qazib olishni ko‘paytirishga keng imkoniyat beradi.