Koreya Respublikasining ilk «Koreya Respublikasi – Markaziy Osiyo» sammiti arafasida Koreya fondi Seul shahrida Markaziy Osiyo davlatlari mutaxassislari va yoshlari uchun qator ta'lim, ilmiy va madaniy tadbirlarni tashkil etdi.

18–20-avgust kunlari Koreya fondi va Koreya Fan va ijodiyot fondi Markaziy Osiyoda sun’iy intellekt bo‘yicha iste'dodlarni rivojlantirish masalasiga bag‘ishlangan uch kunlik dasturni o‘tkazdi. Unda Turkmaniston, Qozog‘iston, Qirg‘iziston, Tojikiston va O‘zbekiston ta'lim tizimi mutaxassislari ishtirok etdilar.

Uchrashuvlarda Koreyaning sun’iy intellekt bo‘yicha mutaxassislarni tayyorlashdagi, jumladan, maktab yoshidan boshlab raqamli va texnologik yo‘nalishlar bo‘yicha kadrlar yetishtirishdagi tajribasi muhokama qilindi. Shuningdek, Markaziy Osiyo mamlakatlarining raqamlashtirish bo‘yicha milliy strategiyalari, mintaqada texnologik mutaxassislarga bo‘lgan talab va kelgusida qo‘shma ta'lim loyihalarini amalga oshirish imkoniyatlari yuzasidan fikr almashildi.

Dastur doirasida mutaxassislar Seul shahridagi yetakchi o‘quv markazlariga tashrif buyurib, ta'lim va texnologiya sohalarida qo‘llanilayotgan innovatsion yondashuvlar bilan tanishdilar.

Shu bilan birga, 19-avgust kuni Yongdeunpo san'at zalida «Markaziy Osiyo: birga yashash kelajagini ochish» nomli yoshlar lektoriyasi bo‘lib o‘tdi. Tadbir «15 daqiqa dunyoni o‘zgartiradi» deb nomlangan KF-Sebasi loyihasi doirasida tashkil etildi.

Lektoriyda Markaziy Osiyo beshta davlatining yosh vakillari Janubiy Koreyadagi o‘qish, ish va hayot tajribalari haqida so‘zga chiqdilar. Turkmaniston nomidan bu tadbirda Koreya hukumati stipendiyasi asosida ta'lim olayotgan Ogulgul Nazarova ishtirok etdi.

Tadbir ishtirokchilari Markaziy Osiyo davlatlarining milliy madaniyati va an'analarini namoyish etuvchi ko‘rgazma bilan ham tanishdilar. Tashkilotchilar va tegishli mamlakatlarning elchixonalari tomonidan tayyorlangan etnografik ko‘rgazmada xalqlarning an'anaviy madaniyatiga tegishli turli qadriyatlar namoyish etildi.

O‘tkazilgan tadbirlar Koreya Respublikasi bilan Markaziy Osiyo davlatlari o‘rtasidagi hamkorlik faqat iqtisodiy munosabatlar bilan cheklanmay, ta'lim, texnologiya, madaniyat va yoshlar aloqalari kabi yo‘nalishlarda ham rivojlanib borayotganini ko‘rsatdi.

Mutaxassislar, o‘qituvchilar va yoshlar o‘rtasida bevosita aloqalarning rivojlanishi uzoq muddatli hamkorlikning yangi yo‘nalishlarini yaratishga va qo‘shma ta'lim-texnologiya tashabbuslarini hayotga tatbiq etishga imkon beradi.