Mejlis deputatligiga, mahalliy ijro etuvchi hokimiyat va mahalliy o‘z-o‘zini boshqarish organlari a’zoligiga nomzodlarning saylovchilar bilan uchrashuvlari boshlandi

Turkmanistonda yangi tashkil etilgan tumanlar xalq maslahati a’zoligiga, shuningdek, vakolat muddati tugashidan oldin bo‘shab qolgan Turkmaniston Mejlisi deputatlari, viloyat, tuman, shahar xalq maslahati va Gengesh a’zolarining 29-mart kuni bo‘lib o‘tadigan saylovlariga qizg‘in tayyorgarlik ko‘rilmoqda. Ushbu ijtimoiy-siyosiy tadbirning ochiqlik va keng raqobat asosida o‘tkazilishi turkman jamiyati hayotida qadimdan kelayotgan demokratik tamoyillarning yanada mustahkamlanayotganining navbatdagi yaqqol ifodasi bo‘ladi.

Turkmanistonda amalda bo‘lgan saylov qonunchiligi me’yorlariga muvofiq, mamlakatimizning barcha go‘shalarida saylovoldi kampaniyasi davom etmoqda. Uning davomida milliy parlament deputatligiga, mahalliy ijro etuvchi hokimiyat va mahalliy o‘z-o‘zini boshqarish organlari a’zoligiga nomzodlar hamda ularning ishonchli vakillari saylovchilar bilan uchrashuvlar o‘tkazmoqda. Saylovchilar nomzodlarning tarjimai hollari, professional va tashkilotchilik qobiliyatlari, saylovoldi dasturlarining asosiy yo‘nalishlari bilan tanishmoqdalar. Ularning asosiy maqsadi Vatanimiz ravnaqini ta’minlash va xalqimiz turmush darajasini yuksaltirishdan iboratdir.

Mamlakatimizni yanada rivojlantirish bo‘yicha dasturlar vazifalarini aniq bayon etgan holda, nomzodlar saylovchilarning ko‘plab savollariga javob bermoqdalar. Nomzodlar Qahramon Arkadagimiz tomonidan asos solingan va hurmatli Prezidentimiz boshchiligida muvaffaqiyatli amalga oshirilayotgan keng ko‘lamli islohotlar dasturlarini hayotga tatbiq etishda o‘z bilim, qobiliyat va tajribalarini ayamayliklariga ishontirmoqdalar. Milliy parlamentda va mahalliy o‘z-o‘zini boshqarish organlarida o‘z okruglari manfaatlarini himoya qilish uchun xalq orasida katta hurmat va ishonchga sazovor bo‘lgan munosib shaxslar nomzod sifatida ko‘rsatilganini ta’kidlash joiz.

Barcha nomzodlarga milliy saylov qonunchiligi va xalqaro huquqning umume’tirof etilgan me’yorlariga muvofiq, saylovchilar bilan uchrashuvlar tashkil etish uchun teng sharoit va imkoniyatlar yaratilmoqda. Saylovga tayyorgarlik ishlari ommaviy axborot vositalarida keng yoritilmoqda, jumladan, saylovchilarning huquqlari va saylovga tayyorgarlik jarayoni haqida maxsus ko‘rsatuvlar efirga uzatilmoqda. Turkmanistonda saylov va referendumlarni o‘tkazish bo‘yicha Markaziy komissiyaning maxsus saytida saylovga oid yangi ma’lumotlar joylashtirib borilmoqda.

Ushbu saylovlar demokratiyani chuqurlashtirish, ijtimoiy-siyosiy islohotlar va xalq hokimiyatchiligining qadimiy tamoyillarini mustahkamlash yo‘lida dadil odimlayotgan mamlakatimizda fuqarolarning milliy birlik tuyg‘usini yangi bosqichga ko‘tarishga xizmat qiladigan alohida ahamiyatga ega voqea bo‘ladi.